Հայաստան–Թուրքիա ֆուտբոլային հանդիպումից առաջ Առաջին հայկական ճակատի (ՖԱՖ) անդամներն անցկացրին իրենց ավանդական երթը։
Sputnik Արմենիան ներկայացնում է երթի ամենավառ պահերը, որը սկսվեց Ալեքսանդր Սպենդիարյանի անվան օպերայի և բալետի ազգային ակադեմիական թատրոնի մոտից։ Երկրպագուները, թմբուկների հարվածների տակ գունավոր ծխագլաններ արձակելով, հասան Վազգեն Սարգսյանի անվան «Հանրապետական» մարզադաշտ։
Նրանք վանկարկում էին` հայե՛ր, սա հայրենիքն է մեր, սա եռագույնն է մեր։
Նշենք, որ ՖԱՖ-ը խաղին սկսել էր պատրաստվել մոտ երկու ամիս առաջ։ Քաղաքին ֆուտբոլային տրամադրություն տալու ու ավելի լայն շրջանակների իրազեկելու համար բազմաթիվ ակցիաներ էր կազմակերպել, Երևանի տարբեր հատվածներում «Կյանքի խաղ» կարգախոսով վահանակներ էր փակցրել։
Հիշեցնենք` Եվրոպայի առաջնության ընտրական մրցաշարի առաջին մրցափուլի Հայաստան- Թուրքիա հանդիպումը տեղի կունենա այսօր` ժամը 21:00-ին։
Մարտի 28-ին Հայաստանի ազգային հավաքականը ընկերական հանդիպում կանցկացնի Կիպրոսի ազգային հավաքականի հետ։
Հայաստանի հավաքականը հանդես է գալիս D խմբում, որտեղ նրա մրցակիցներն են Խորվաթիայի, Թուրքիայի, Ուելսի և Լատվիայի հավաքականները։