Ֆրանսիայում ավելի քան մեկ միլիոն մարդ է մասնակցել կենսաթոշակային տարիքի բարձրացման դեմ բողոքի ակցիաներին։ Այս մասին, Le Monde պարբերականին և Ֆրանսիայի ՆԳՆ–ին հղում անելով, հայտնում է RT–ն։ Փարիզում ցույցի մասնակիցները կոտրել են խանութի ցուցափեղկերն ու այրել աղբը։
Լիլում զայրացած ամբոխի դեմ արցունքաբեր գազ է կիրառվել։ Երկաթուղայինները նստում են ռելսերին և այրում գծերը։ Նավահանգստային քաղաքներում արգելափակված են նավահանգիստները. միայն Մարսելում ավելի քան 280 հազար մարդ է դուրս եկել իր բողոքն արտահայտելու։
Փարիզում փակվել են Շառլ դը Գոլ օդանավակայան տանող մուտքերը, ուղևորներն ու անձնակազմը ստիպված են տերմինալ հասնել ոտքով, թեպետ չվերթերը հետաձգվում կամ չեղարկվում են` ավիադիսպետչերները ևս գործադուլ են անում։
Ֆրանսիան աղբակույտի է վերածվել, կուտակվել է այն աղբը, որը ցուցարարները դեռ չեն հասցրել այրել. աղբահանները ևս գործադուլ են անում։
Մարտի 20-ին Ֆրանսիայի Ազգային ժողովը մերժել էր Մարին Լը Պենի կուսակցության առաջարկած կենսաթոշակային բարեփոխումների պատճառով կառավարությանն անվստահություն հայտնելու առաջարկը։ Մինչ այդ մերժվել էր նաև ընդդիմադիր LIOT խմբի առաջ քաշած մեկ այլ որոշում։
Մարտի 16-ին Ֆրանսիայի վարչապետ Էլիզաբեթ Բորնը հայտարարել էր նոր օրենքի ընդունման մասին, որի համաձայն կենսաթոշակային տարիքը 62-ից պետք է բարձրացվի 64-ի։ Օրենքն ընդունվել էր` շրջանցելով քվեարկությունը խորհրդարանի ստորին պալատում։