ԵՐԵՎԱՆ, 24 մարտի – Sputnik. Այսօր ԱՄՆ հրթիռային էսկադրոնային ականակիրը կրկին մտել է Հարավչինական ծովի Սիշա (Պարասելյան կղզիներ) վիճահարույց կղզիների ծովային տարածք։ Այս մասին, ՌԻԱ Նովոստիի փոխանցմամբ, հայտնում է Չինաստանի ՊՆ պաշտոնական ներկայացուցիչ Տան Կեֆեյը։
«Մարտի 24-ին USS Milius հրթիռային ականակիրը կրկին առանց Չինաստանի կառավարության թույլտվության ապօրինի մտել է Սիշա արշիպելագի (Պարասելյան կղզիներ) ջրային տարածք` խաթարելով խաղաղությունն ու կայունությունը Հարավչինական ծովում», – հայտարարել է Տան Կեֆեյը, որի խոսքերը մեջբերվում է ՉԺՀ–ի ՊՆ–ի WeChat սոցցանցի պաշտոնական էջում։
Նա ընդգծել է, որ ԱՄՆ զինվորականների գործողությունները կոպիտ ոտնձգություն են Չինաստանի ինքնիշխանության և անվտանգության նկատմամբ և միջազգային իրավունքի լուրջ խախտում։
«Ամերիկյան կողմից պահանջում ենք անհապաղ դադարեցնել նման սադրիչ գործողությունները, այլապես ԱՄՆ-ն կկրի դրանցից առաջացած լուրջ հետևանքների ողջ պատասխանատվությունը», – նշել է նա։
Տասնամյակներ շարունակ Պեկինը Ասիա-Խաղաղօվկիանոսյան տարածաշրջանի մի քանի երկրների հետ վիճում է Հարավչինական ծովում (որտեղ ածխաջրածինների զգալի պաշար են հայտնաբերել) մի շարք կղզիների տարածքային պատկանելության վերաբերյալ։ Խոսքը նախևառաջ Սիշա արշիպելագի, Սփրաթլի կղզիների (որոնցից մեկը Փագ–ասան է) և Խուանյանի մասին է։ Այս վեճում այս կամ այն կերպ ներգրավված են նաև Վիետնամը, Բրունեյը, Մալայզիան և Ֆիլիպինները։
Իրավիճակը տարածաշրջանում հաճախ սրվում է այստեղով ԱՄՆ-ի ռազմանավերի անցման պատճառով, որոնք, Չինաստանի ԱԳՆ-ի պնդմամբ, խախտում են միջազգային իրավունքը, խաթարում Չինաստանի ինքնիշխանությունն ու անվտանգությունը։ Չնայած Պեկինի բողոքներին, պաշտոնական Վաշինգտոնը հայտարարել է, որ ԱՄՆ-ն «լողալու և թռչելու է» միջազգային իրավունքով թույլատրված բոլոր տեղերում։