Պաշտոնյաների արտասահմանյան գործուղումներին վերաբերող կառավարության որոշումը ոչ մի կերպ չի տեղավորվում իշխանության թափանցիկ աշխատելու տրամաբանության մեջ։
Sputnik Արմենիայի հետ զրույցում այս տեսակետը հայտնեց Աուդիտորների պալատի նախագահ, տնտեսագետ Նաիրի Սարգսյանը` մեկնաբանելով ՀՀ կառվարության նիստում ընդունված որոշումը, որի համաձայն, գործուղումներին ուղղված ծախսերն այլևս բյուջեում առանձին չեն արտացոլվելու։
«Առաջին հերթին դա արվել է, կարծում եմ, հենց թափանցիկությունը չապահովելու համար, որովհետև, եթե այս իրավիճակում քննադատությունների թիրախ են դառնում, երբ հնարավոր է բյուջեից առանձին տողով հանել- մատնանշել, որ` ինչու եք, օրինակ այսինչ անարդյունավետ գործուղման համար այսինչ անարդյունավետ ծախսն իրականացրել, ապա գերատեսչություններին տրամադրելուց և ընթացիկ ծախսերում նշելուց հետո որևէ մեկը չի կարողանալու մատնանշի»,– ասաց Սարգսյանը։
Բացի այդ, տնտեսագետի կարծիքով, բյուջեում գործուղման ծախսերն առանձին ներկայացվելու դեպքում դրանց կատարման ընթացքն ու արդյունավետությունը կարող է վերահսկվել նաև ֆինանսների նախարարության կողմից, մինչդեռ նոր կարգով պետությունն ինքն է կորցնում առանձին կառույցների ծախսերի նկատմամբ վերահսկողության լծակը։
Այս պայմաններում վերահսկողական մարմինները մնում են Վերահսկողության ծառայությունն ու Հաշվեքննիչ պալատը։ Բայց այդ կառույցները, ըստ Սարգսյանի, շատ դանդաղ են աշխատում, ըստ հասատված պետական պլանի, և 2023թ–ի բյուջեի ծախսերի վերահսկողության արդյունքները հանրության համար հասանելի կարող են դառնալ միայն տարիներ անց, երբ չափազանց ուշացած կլինեն։
«Արդյունքում կստացվի, որ գերատեսչության ղեկավարը կամ գերատեսչության ղեկավարի սիրելի անձինք կարող են իրենց թույլ տալ ավելի թանկարժեք հյուրանոցներում գիշերել, ավելի թանկարժեք դասերով երթևեկել և այլն»,– ասաց մեր զրուցակիցը։
Կառավարության նոր որոշումը վերահսկողության ու տեղեկատվություն ստանալու իրավունքից անուղղակիորեն զրկում է նաև հասարակական կազմակերպություններին ու լրատվամիջոցներին։
«Եթե նույնիսկ լրագրողական հարցումներ ուղարկեք առանձին գերատեսչություններին, ապա կարող են մերժվել այն պատճառաբանությամբ, որ գործուղումների ծախսերի առանձին հաշվարկ գերատեսչությունում չի տարվում, և հաշվապահական բաժնում առանձին հոդվածները բացակայում են»,– ասաց նա։
Հիշեցնենք` ՀՀ կառավարության մարտի 23-ին կայացած նիստում ընդունված որոշմամբ, ՀՀ 2023թ–ի բյուջեից հանվել է «արտասահմանյան պաշտոնական գործուղումներ» տողը։
Եթե մինչ օրս արտասահմանյան պաշտոնական գործուղումների համար նախատեսված միջոցները ՀՀ պետական բյուջեում ներկայացվում էին առանձին տողով, ապա նոր որոշման համաձայն, այսուհետ այդ գումարները բաշխվելու են իշխանության մարմիններին` ներառելով տվյալ կառույցի պահպանման ծախսերում:
Որոշումն ուժի մեջ է մտնում 2023 թվականի ապրիլի 1-ից: