ԵՐԵՎԱՆ, 22 մարտի – Sputnik. Հայաստանում ապաստան հայցողների համար նոր կացարան է կառուցվում Կոտայքի մարզի Աբովյան քաղաքում։ ՆԳՆ մամուլի ծառայությունը հայտնում է, որ 120 ապաստան հայցողի համար նախատեսված կացարանի շինարարական աշխատանքներն ավարտին կհասցվեն այս տարի։
Հայաստանում ապաստան հայցողների համար նոր կացարան է կառուցվում
«Ներկայումս ենթակառուցվածքները չեն բավարարում ապաստան հայցողների տարեկան հոսքին, որ կազմում է միջինում 250 անձ, իսկ 2022 թ-ին ցուցանիշը կազմել է 968»,– տեղեկացնում են նախարարությունից։
Շինարարության բյուջեն 1.5 մլն դոլար է: Նշվում է, որ շինարարության ավարտը նախատեսված էր ավելի վաղ, սակայն կորոնավիրուսի համավարակի հետևանքով հետաձգվել է։
Նոր կացարանի կառուցման աշխատանքներն իրականացվում են Միգրացիոն քաղաքականության մշակման միջազգային կենտրոնի համակարգմամբ։ Ֆինանսական աջակցություն են ցուցաբերել Նիդեռլանդների, Դանիայի և Գերմանիայի կառավարությունները։
Հիշեցնենք, որ օտարերկրյա քաղաքացիները, որոնք ՀՀ իշխանություններից փախստականի կարգավիճակ և ապաստան են հայցում, կարող են ժամանակավորապես բնակվել հատուկ կացարանում: