ԵՐԵՎԱՆ, 21 մարտի – Sputnik. ՀՀ առողջապահության նախարարությունն առաջարկում է բժշկական կենտրոններն ու դեղատները լիցենզավորել 5 տարի ժամկետով: «Լիցենզավորման մասին» օրենքում առաջարկվող լրացումը Ազգային ժողովում ներկայացրեց առողջապահության նախարար Անահիտ Ավանեսյանը։
«Նախագծի ընդունումը պայմանավորված է մեր ռազմավարությամբ նախատեսված կարևորագույն ուղղությունների իրագործմամբ, այն է` բժշկական օգնության որակը մշտապես բարելավելով։ Կառավարության ծրագրով նախատեսված, բժշկական որակի բարելավմանն ուղղված մի շարք միջոցառումներ ունենք, որոնց շարքում բժշկական կազմակերպությունների ենթակառուցվածքների բարելավումն է, մասնագիտական կարողությունների թարմացումը և բժշկագիտության զարգացումը»,– ասաց Ավանեսյանը։
Նրա խոսքով` համաձայն նախագծի՝ նախատեսվում է, որ բժշկական կազմակերպությունների լիցենզավորումը կիրականացվի պարբերական բնույթով, և ամեն 5 տարին մեկ կազմակերպությունը պետք է հավաստի, որ համապատասխանում է տվյալ պահին առկա լիցենզավորման մասին բոլոր պահանջներին։
Առողջապահության նախարարը հայտնեց նաև, որ լիցենզավորման կարգերում նախատեսված կանոնների և պայմանների լայնածավալ փոփոխություններ են նախաձեռնել։
Ավանեսյանը վստահեցրեց` առաջիկայում, ինչպես ենթակառուցվածքների, այնպես էլ սարքավորումների, մասնագիտական հագեցվածության և որոշակի ծառայությունների համախմբման ստանդարտներն ավելի ու ավելի են բարձրացնելու։
«Օրենքով նաև նախատեսվում են բավականին ընդարձակ անցումային դրույթներ, որովհետև մենք պատկերացնում ենք, որ Հայաստանում գործող բժշկական կազմակերպությունների լիցենզավորման գործընթացը շատ աշխատատար ու ժամանակատար է։ Ամեն ինչ սահուն կազմակերպելու համար մենք նախատեսել ենք ավելի ռիսկայնություն պարունակող ուղղությունների առաջնահերթություն»,– նշեց նախարարը։
Նա ընդգծեց` սկսելու են Երևանից, այնուհետև անցում կատարելով մարզային բժշկական կենտրոններ և պոլիկլինիկաներ` սկսելու են ամբողջ համակարգի վերալիցենզավորման գործընթացը։
Նշենք, որ այժմ բժշկական կենտրոններին ու դեղատներին լիցենզիան տրվում է անժամկետ։