Արագածավան գյուղի մոտ տեղի ունեցած ՃՏՊ–ի հետևանքով 1 մարդ մահացել է, 3-ը` վիրավորվել

Արագածավան գյուղի մոտ տեղի ունեցած ավտովթարը
BMW մակնիշի ավտոմեքենան դուրս է եկել երթևեկելի հատվածից և գլորվել ձորակը։
Sputnik
ԵՐԵՎԱՆ, 19 մարտի – Sputnik. Արագածոտնի մարզի Արտենի-Արագածավան ավտոճանապարհին տեղի է ունեցել ավտովթար, ինչի հետևանքով 1 անձ մահացել է։ Տեղեկությունը հայտնում է ՀՀ ՆԳՆ փրկարար ծառայությունը։
Դեպքի մասին ահազանգը ստացվել է մարտի 19-ին, ժամը 00։00-ին, նշվել է նաև, որ ավտոմեքենայում կա արգելափակված քաղաքացի։
«Դեպքի վայր մեկնած փրկարարական ծառայությունը պարզել է, որ Արագածավան գյուղի սկզբնամասում BMW մակնիշի ավտոմեքենան (վարորդ՝ Բ․ Ջ․, ծնված 1971 թ․) դուրս է եկել ճանապարհի երթևեկելի հատվածից և գլորվելով հայտնվել հարակից ձորակում։ Մինչ փրկարարների կանչի վայր հասնելը՝ ավտոմեքենայի վարորդը, ուղևորներ Է․ Ջ․-ն (ծնված 1948 թ․), Ա․ Գ. (ծնված 1968 թ․) և Հ․Գ. (ծնված 1964 թ․) տեղի ուժերով դուրս են բերվել ավտոմեքենայից»,– ասված է հաղորդագրությունում։
Ա․Գ-ն և Հ․ Գ․-ն հոսպիտալացվել են Արմավիրի ԲԿ, իսկ Բ․ Ջ–ն և Է․ Ջ․-ն՝ Թալինի ԲԿ, որտեղ Է․ Ջ․-ն մահացել է։
Բժիշկները տուժածների առողջական վիճակը գնահատել են միջին ծանրության։