Ազատ ոճի երկու հայ ըմբշամարտիկ դուրս են եկել Բուխարեստում ընթացող մինչեւ 23 տարեկանների Եվրոպայի առաջնության եզրափակիչ: Այս մասին տեղեկացնում է Հայաստանի ըմբշամարտի ֆեդերացիան։
86 կգ քաշային կարգում հանդես եկող Կնյազ Իբոյանը կիսաեզրափակիչում հաղթեց թուրք ըմբիշին և ստացավ եզրափակիչի ուղեգիր։ Մենամարտը սկզբում ավարտվեց 2։2 հաշվով, վերջին միավորը վաստակեց հայ մարզիկը (այս դեպքում հաղթանակը պետք է շնորհվեր նրան,– խմբ.)։
Թուրք ըմբիշի մարզիչները բողոքարկեցին մրցավարների որոշումը, բայց բողոքը մերժվեց ու արդյունքում Իբոյանը ստացավ ևս մեկ միավոր։ Մենամարտն ավարտվեց 3։2 հաշվով։
Երբ Կնյազ Իբոյանը սպասում էր մրցավարների որոշմանը, չէր կարողանում հանգիստ կանգնել տեղում։ Իսկ մարզագորգից այն կողմ լսվում էր մարզիչի ձայնը. «Տեղդ կանգնի՛, տղա ջան, կրել ես... հանգիստ կանգնի քո տեղը»։
Նշենք, որ Եվրոպայի առաջնությունում ոսկե մեդալի համար կպայքարի նաև Մեժլում Մեժլումյանը: Նա կիսաեզրափակիչում 6:5 հաշվով առավելության հասավ իտալացի մարզիկի նկատմամբ:
Եվս երկու ազատ ոճի ըմբիշներ կպայքարեն առաջնության բրոնզե մեդալների համար` 57 կգ քաշային Էդիկ Հարությունյանը և 79 կգ քաշային Նարեկ Գրիգորյանը։ Նրանք կմրցեն ադրբեջանցի մարզիկների հետ։
Նշենք, որ մինչև 23 տարեկանների Եվրոպայի առաջնությունը տեղի է ունենում Ռումինիայի մայրաքաղաք Բուխարեստում։
Ավելի վաղ Հայաստանի հունահռոմեական ոճի ըմբշամարտի հավաքականը Մ23 ԵԱ-ում նվաճել էր մեկ արծաթե և երեք բրոնզե մեդալ: