ԵՐԵՎԱՆ, 17 մարտի – Sputnik. Որոշում է կայացվել Հայաստան–Թուրքիա ֆուտբոլային հանդիպման մոտ 5 հազար տոմս ոչ թե վաճառել, այլ տրամադրել սեփական և վստահելի մարդկանց՝ այնտեղ հնարավոր լարվածություն թույլ չտալու համար: Այս մասին գրում է «Ժողովուրդ» օրաթերթը։
Թերթը շեշտադրում է անում այն բանի վրա, որ ՀՖՖ–ն կրկին չի կարողանում վերահսկել խաղերի տոմսերի վաճառքն ու սև շուկան, և մեծ թվով ֆուտբոլասերներ պարզապես զրկվել են մարզադաշտում Հայաստանի հավաքականի խաղը դիտելու հնարավորությունից:
Մարտի 6-ին ՀՖՖ-ն պաշտոնական կայքում հայտնեց, որ մեկնարկում է Հայաստան-Թուրքիա հանդիպման տոմսերի առցանց վաճառքը: Ֆեդերացիան երկրպագուներին խոստացել էր, որ տոմսերի վաճառքը «Հանրապետական» մարզադաշտի տոմսարկղում կմեկնարկի ավելի ուշ:
Ընդ որում՝ տոմսերն ինչպես առցանց, այնպես էլ Վ. Սարգսյանի անվան Հանրապետական մարզադաշտի տոմսարկղից հնարավոր է գնել միայն անձնագրային նույնականացում անցնելուց հետո։ Մեկ անձը կարող է գնել ոչ ավելի, քան երկու տոմս:
Բայց ստացվեց, որ մեկ շաբաթում սպառվել է գրեթե 15 հազար տոմս։ Տոմսերի սպառման վերաբերյալ ՀՖՖ–ի հայտարարությունից հետո համացանցում մի շարք երկրպագուներ հայտնել են իրենց դժգոհությունը։
«Եվ, ահա, այս հանգամանքն առաջացրել է երկրպագուների զայրույթը, դարձել տոմսերի սև շուկայում ընթացող վաճառքի զարգացման հիմք: Օրինակ՝ արևելյան տրիբունայում այժմ կարող եք մեկ տոմսը 3-5 հազար դրամի փոխարեն ձեռք բերել 25-35 հազար դրամով, հարավային և հյուսիսային տրիբունաներում մեկ տոմսի արժեքը, 2 հազար դրամի փոխարեն, 20 հազար դրամ է, արևմտյան տրիբունայում մեկ տոմսի արժեքը հասնում է 50 հազար դրամի՝ 10 հազար դրամի փոխարեն»,–գրում է օրաթերթը:
Հիշեցնենք` մարտի 25-ին Վ. Սարգսյանի անվան «Հանրապետական» մարզադաշտում ֆուտբոլի Հայաստանի ազգային հավաքականը կընդունի Թուրքիայի հավաքականին:
Հայաստանի ֆուտբոլի ֆեդերացիան հայտարարել էր, որ ՈւԵՖԱ-ի հատուկ որոշմամբ Հայաստանում կայանալիք Հայաստան-Թուրքիա հանդիպման խաղին թուրք երկրպագուներ ներկա չեն լինի։