ԵՐԵՎԱՆ, 13 մարտի – Sputnik. 2022 թ–ի փետրվարից մինչև 2023թ–ի մարտի 1-ը ՀՀ– ում գտնվող` Ռուսաստանի, Բելառուսի և Ուկրաինայի քաղաքացիություն ունեցող անձանց ընդհանուր թիվ կազմել է 113.700 անձ, որոնցից 64.862–ը «յան» ազգանունով են։ Այս մասին այսօր ԱԺ տարածաշրջանային և Եվրասիական ինտեգրման հարցերի հանձնաժողովի նիստի ժամանակ հայտարարեց ՀՀ էկոնոմիկայի նախարար Վահան Քերոբյանը։
Նախարարը տեղեկացրեց, որ նախորդ տարվա ընթացքում ՌԴ քաղաքացիություն ունեցող 7328 անձինք իրենց տնտեսական գործունեության կենտրոնը տեղափոխել են Հայաստան, 2345–ը եղել են կազմակերպություն, իսկ 5000–ը` անհատ ձեռնարկատեր։
«Ծրագրային ապահովման մշակման ոլորտում` մոտ 3900 կազմակերպություն և ԱՁ, մեծածախ և մանրածախ առևտրի ոլորտում` 679, ՏՏ և համակարգչային տեխնիկայի ոլորտում` 339»,– թվարկեց Քերոբյանը։
Նախորդ տարի էականորեն աճել է նաև ԵԱՏՄ երկրներից Հայաստան ժամանած զբոսաշրջիկների թիվը։
«Մեր երկիր այցելած զբոսաշրջիկների ընդհանուր թիվը կազմել է 1 մլն 665 հազար 658, որոնցից 790 հազար 400–ը եղել են ՌԴ–ից, 17 հազար 200–ն էլ Բելառուսից են եկել Հայաստան»,– ասաց նախարարը։
Նրա խոսքով` 2022–ի աճել են նաև ՌԴ–ից դրամական փոխանցումները դեպի Հայաստան` կազմելով 3.6 մլդ դոլար (2021-ի համեմատ դրամական փոխանցումները աճել են 4.2 անգամ)։