Իսպանիայի ոստիկանությունը ուժ է կիրառել թուրք երկրպագուների նկատմամբ. տեսանյութ

ԵՐԵՎԱՆ, 10 մարտի – Sputnik. Միջադեպը տեղի է ունեցել«Սևիլյա» (Իսպանիա) –«Ֆեներբախչե» (Թուրքիա) խաղի ժամանակ։ ԶԼՄ–ները հայտնում են, որ իսպանացի ոստիկանները ուժ են կիրառել թուրք երկրպագուների նկատմամբ։

Մասնավորապես, համացանցում տեսանյութ էր տարածվել, որում երևում է` ինչպես են ոստիկանները սկզբում լուռ հետևում տրիբունաներում տեղի ունեցող իրադարձություններին, այնուհետև ներքև են քաշում երկրպագուներից մեկին և սկսում մահակներով հարվածել։

Միևնույն ժամանակ, թուրքական ԶԼՄ–ները չեն հայտնում, թե ինչն է իսպանացի ուժայինների նման գործողությունների պատճառ դարձել։

Նշենք, որ «Սևիլյան» Եվրոպայի լիգայի 1/8 եզրափակչի շրջանակում հյուրընկալել էր թուրքական թիմին։

Խաղն ավարտվել է 2:0 հաշվով` հօգուտ«Սևիլյային», թեև ի սկզբանե Իսպանիայի թիմը էական առավելություն չուներ մրցակցի նկատմամբ։

Երկրորդ խաղակեսի սկզբին Խոան Խորդանը անդրադարձի օգնությամբ անմիջապես բացեց հաշիվը։ Խաղի վերջում Էրիկ Լամելը երկրորդ գոլը խփեց։

Այժմ «Սևիլյան» պատասխան խաղից առաջ լավ հնարավորություն ունի քառորդ եզրափակիչ անցնելու համար։