ԵՐԵՎԱՆ, 9 մարտի – Sputnik. Ադրբեջանական ագրեսիայից հետո Սյունիքի մարզի Ներքին Հանդ գյուղում կայուն եկամուտը մնացել է միայն պետական աշխատողների մոտ։ Այս մասին Sputnik Արմենիայի հետ զրույցում ասաց գյուղապետ Խաչիկ Բաղդասարյանը։
Գյուղը զրկվել է բոլոր արոտավայյրերից և գյուղատնտեսական նշանակության հողերից։ Հարցին, թե այս պայմաններում գյուղացիներն ինչով են զբաղվում, որ ապրեն, Բաղդասարյանն ասում է.
«Ոչ մի բանով, ի՞նչ անեն։ «Դիվան» են քշում»։ Անասուն, հող, ամեն ինչ կորցրել են։ Եկամտի աղբյուր այս պահին չկա, մարդիկ տնամերձներն են մշակում։ Մի կերպ ապրում են նախորդ տարվանից մնացածի հաշվին։ Մարդ կա` դպրոցում է աշխատում, մի քանիսն էլ` արգելոցում ու գյուղապետարանում»։
Գյուղապետարանը հավի և հնդուհավի ճտեր է բերել գյուղ։ Մոտ 20 ընտանիք դրանց բուծմամբ է զբաղվում։ Ընտանիքներից մեկն էլ ճագարաբուծությամբ զբաղվելու ցանկություն է հայտնել։ Սակայն դա, գյուղապետի համոզմամբ, խնդրի երկարատև լուծում չի կարելի համարել։
Նրա խոսքով` այս շրջանում Ադրբեջանի առաջխաղացումից հետո մի քանի ընտանիք այդպես էլ գյուղ չվերադարձան. մնացածները հիմնականում մեծահասակներ են, որոնք խնամքի կարիք ունեն։
Ինչ վերաբերում է անվտանգությանը, ապա վերջին շրջանում, չնայած ադրբեջանական դիրքերի մոտ լինելուն, իրավիճակը համեմատաբար հանգիստ է։
2022 թվականի սեպտեմբերի 13-14–ի ադրբեջանական ագրեսիայից հետո գյուղում ստեղծված իրավիճակի մասին ավելի մանրամասն` Sputnik Արմենիայի նախորդ նյութում։