ԵՐԵՎԱՆ, 7 մարտի – Sputnik. Երևան քաղաքի ընդհանուր իրավասության դատարանը՝ Աննա Դանիբեկյանի նախագահությամբ, այսօր հետաձգեց «Սիլվայի գործով» դատական նիստը, որով անցնում են ՀՀ 2-րդ նախագահ Ռոբերտ Քոչարյանն ու ՀՀ նախկին փոխվարչապետ Արմեն Գևորգյանը։
«Առողջական խնդիրներով պայմանավորված՝ ՀՀ երկրորդ նախագահ Ռոբերտ Քոչարյանը չի ներկայացել դատարան։ Հաջորդ դատական նիստը տեղի կունենա ապրիլի 18-ին, ժամը 13։00-ին»,– Sputnik Արմենիային տեղեկացրին Քոչարյանի փաստաբանական թիմից։
Քոչարյանի վատառողջ լինելու պատճառով փետրվարի 14-ին նշանակված դատական նիստը նույնպես հետաձգվել էր։ Այդ ժամանակ փաստաբան Հովհաննես Խուդոյանը հայտնել էր, որ շուրջ 5 օր անհրաժեշտ կլինի, որպեսզի նախագահը բուժում ստանա։ Հաջորդ նիստը նշանակվել էր փետրվարի 21-ին։
Հիշեցնենք` Ռոբերտ Քոչարյանն ու ՀՀ նախկին փոխվարչապետ Արմեն Գևորգյանը որպես մեղադրյալ են անցնում մեկ քրեական գործի շրջանակներում։ Քոչարյանին մեղադրում են առանձնապես խոշոր չափի կաշառք ստանալու, իսկ Գևորգյանին՝ փողերի լվացման մեջ։
Ըստ մեղադրանքի` Քոչարյանը, իր պաշտոնեական դիրքն օգտագործելով, նպաստել է «Թի Էս Էս Սի Արմենիայի» տնօրեն Սիլվա Համբարձումյանի օգտին գործողություններ կատարելուն, այն է՝ ընկերությանը տրամադրված ընդերքն օգտակար հանածոների շահագործման նպատակով ուսումնասիրության լիցենզիաներով ընկերության 100 տոկոս բաժնեմասը ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար 2008-ի փետրվարին և մայիսին Սամվել Մայրապետյանի օժանդակությամբ նրանից ստացել է 3 միլիոն դոլար կաշառք։
Նրան մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով (առանձնապես խոշոր չափի կաշառք ստանալը)։