ԵՐԵՎԱՆ, 7 մարտի – Sputnik. Գերմանիայի կանցլեր Օլաֆ Շոլցը գերմանական ճշտապահությամբ է Լեռնային Ղարաբաղի խնդրին մոտեցել: Լրագրողների հետ զրույցում այս մասին ասաց ՀՀ երրորդ նախագահ Սերժ Սարգսյանը՝ անդրադառնալով Շոլցի այն հայտարարությանը, որ ԼՂ հարցը պետք է լուծվի նաև ազգերի ինքնորոշման սկզբունքի հիման վրա:
Երրորդ նախագահը հիշեցրեց 2017 թվականին ԵՄ-ի հետ ստորագրված «Համապարփակ և ընդլայնված համագործակցության» համաձայնագիրը, որը վավերացվել է ԵՄ անդամ բոլոր երկրների կողմից:
«Գերմանիայի կանցլերը այլ բան չէր կարող ասել, որովհետև իր երկրի խորհրդարանը հաստատել էր այդ համաձայնագիրը, որտեղ բառացիորեն Ղարաբաղին վերաբերող հատվածը Մինսկի խմբի առաջարկներն էին: Այլ բան, որ գլխավոր բանակցողը խուսափում է, փախչում է ինքնորոշում բառից, ինչպես սատանան խնկից: Դրա համար ինքը որևէ արձագանք չտվեց»,- ասաց Սարգսյանը։
Երրորդ նախագահի կանխատեսմամբ՝ գոնե մոտ ապագայում չի լինելու որևէ եվրոպական երկիր, որը խոսի Ղարաբաղն Ադրբեջանի կազմում լինելու մասին:
Այդպիսով, Սարգսյանի խոսքով, նրանք կհակասեն Եվրոպական խորհրդարանի կողմից վավերացված համաձայնագրի դրույթներին։