ԵՐԵՎԱՆ, 2 մարտի – Sputnik. Գերմանիան մտահոգված է Հայաստանի և Ադրբեջանի սահմանին տիրող անկայունությամբ և ԼՂՀ–ում գնալով սրվող հումանիտար իրավիճակով։ Այս մասին այսօր հայտարարեց Գերմանիայի կանցլեր Օլաֆ Շոլցը ՀՀ վարչապետ Նիկոլ Փաշինյանի հետ համատեղ ասուլիսի ժամանակ։
«Ստատուս քվոն չի կարող շարունակվել , այն պետք է ի բարօրություն մարդկանց երկարաժամկետ լուծման հանգի։ Անհրաժեշտ է հասնել խաղաղ հանգուցալուծման Հայաստանի և Ադրբեջանի տարածքային ամբողջականության, ինչպես նաև ԼՂ քաղաքացիների ինքնորոշման իրավունքի տեսանկյունից։ Ընդ որում`այս բոլոր սկզբունքները հավասարազոր պետք է լինեն»,– նշեց նա։
Գերմանիայի կանցլերն ասաց, որ մինչև մամուլի ասուլիսը Նիկոլ Փաշինյանի հետ մտքեր է փոխանակել հայ–գերմանական հարաբերությունների խորացման մասին։
Նա նաև տեղեկացրեց, որ Գերմանիան կշարունակի Հայաստանին օգնել իր հնարավորությունների սահմաններում, որպեսզի Հայաստանում համապարփակ ռեֆորմների գործընթացը իրականանա։
Ըստ պաշտոնական հաղորդագրության` նա Շոլցի հետ հանդիպումից հետո այցելելու է Արտաքին հարաբերությունների գերմանական խորհուրդ։ Վաղը նախատեսված է Փաշինյանի հանդիպումը ԳԴՀ նախագահ Ֆրանկ-Վալտեր Շտայնմայերի հետ: