Ռուսական խաղաղապահ զորախմբի զինծառայողները «Մենք միասնական ենք» բազմազգ նախագծի կամավորների հետ համատեղ մարդասիրական ակցիա են անցկացրել՝ այցելելով Ստեփանակերտի 12 դպրոցներ։
Միջոցառման ընթացքում խաղաղապահներն ու կամավորներն ավելի քան 700 պարենային փաթեթ են բաժանել սոցիալական դժվարին իրավիճակում հայտնված ընտանիքներին։
Բեռը ՌԴ–ից Երևան է հասցրել Ռուսաստանի օդատիեզերական ուժերի ռազմատրանսպորտային ավիացիան։
ՌԴ խաղաղապահները նման միջոցառումներ պարբերաբար են անցկացնում։ Նրանք տեղեկություններ են հավաքում առավել կարիքավորների մասին, գործակցում են բարեգործական կազմակերպությունների հետ և անհրաժեշտ մարդասիրական օգնությունը փոխանցում Լեռնային Ղարաբաղի մանկական կրթական հաստատություններին ու ընտանիքներին։
Հիշեցնենք` դեկտեմբերի 12-ից Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։ Դեկտեմբերի 13-ից ադրբեջանական կողմը ժամանակ առ ժամանակ անջատում է Արցախի գազամատակարարումը։
Հունվարի 9-ից ադրբեջանական վերահսկողության տակ գտնվող տարածքից անջատվել է նաև Հայաստանից դեպի Արցախ էներգասնուցումը: Ադրբեջանական կողմը հնարավորություն չի տալիս, որ մասնագետները մոտենան և հասկանան պատճառները՝ անհրաժեշտության դեպքում վթարավերականգնողական աշխատանքներ իրականացնելու համար: Արցախում էլենտրաէներգիայի մատակարարումն իրականացվում է հովհարային անջատումներով։
Լաչինի միջանցքը շարունակում է փակ մնալ։