ԵՐԵՎԱՆ, 25 փետրվարի – Sputnik. ՀՀ Արարատի, Արմավիրի, Սյունիքի և Վայոց Ձորի մարզերում գրանցված հանցագործությունների թիվը նախորդ տարվա համեմատ աճել է։ Տեղեկությունը հայտնում է ՀՀ գլխավոր դատախազության մամուլի ծառայությունը` նշելով, որ փետրվարի 21-ին և 23-ին Արմավիրի և Վայոց Ձորի մարզերի դատախազություններում գլխավոր դատախազի տեղակալ Արթուր Պողոսյանի գլխավորությամբ ամփոփվել են 2022 թվականի գործունեության արդյունքները:
Արմավիրի մարզի դատախազ Վահան Սարգսյանը հայտնել է, որ 2022 թ–ին մարզում գրանցված հանցագործությունների թիվը նախորդ տարվա համեմատ աճել է 310-ով՝ կազմելով 2161 (2021 թվականին՝ 1851 դեպք):
«Սեփականության դեմ ուղղված հանցագործությունների դեպքերը նվազել են 38-ով՝ կազմելով 702, բնակարանային գողությունների թիվն աճել է 5-ով՝ կազմելով 71: Մարզում 80–ով աճել են թմրամիջոցների ապօրինի շրջանառության դեպքերը՝ կազմելով 234 (2021 թվականին՝ 154)»,– ասված է հաղորդագրությունում։
Նշվում է, որ նվազել են ավազակության, անձնական գույքի հափշտակությունների, գողությունների դեպքերը։ Մարզում նվազել են կոռուպցիոն հանցագործությունների բացահայտումները:
Դատախազ Արթուր Պողոսյանն էլ եղել է Վայոց Ձորում, որտեղ մարզի դատախազ Ասպուրակ Ավետիսյանը հայտնել է, որ 2022-ին հանցագործությունները մարզում նախորդ տարվա համեմատ աճել են: Արձանագրվել է հանցագործության 422 դեպք (2021 թվականին՝ 303):
«Մարզում միջին ծանրության հանցագործությունների թիվն աճել է 102–ով՝ կազմելով 172 (2021 թվականին՝ 70), ծանր հանցագործությունների թիվն աճել է 2–ով՝ կազմելով 45 (2021 թվականին՝ 43): Նախորդ տարի մարզում 2–ովաճել են նաև բնակարանային գողության դեպքերը, նվազել՝ անձնական գույքի գողությունները, խարդախությունները, յուրացման կամ վատնման դեպքերը: 2022 թվականին մարզում աճել է թմրամիջոցների ապօրինի շրջանառության թիվը, այդ թվում՝ իրացման, զենքի ապօրինի շրջանառության և խուլիգանության դեպքերը»,– նշում են դատախազությունում:
Պողոսյանը մարզերի դատախազներին հանձնարարել է բացառել անհարգելի պատճառով դատական նիստերին չներկայանալու դեպքերը, ուշադրության կենտրոնում պահել 8 ամսից ավելի քննվող քրեական վարույթներն ու ձգձգման պատճառները:
Գլխավոր դատախազի մեկ այլ տեղակալ Գևորգ Բաղդասարյանն էլ փետրվարի 16-ին և 17-ին եղել է Արարատի և Սյունիքի մարզերում, որտեղ նույնպես ամփոփվել են դատախազությունների 2022 թվականի գործունեության արդյունքները։
Արարատի մարզի դատախազ Ռաֆայել Մանուկյանի տեղեկացմամբ՝ 2022 թվականին մարզում գրանցվել է հանցագործության 2 հազար 167 դեպք (2021 թվականին՝ 1922 դեպք)։ Արարատում արձանագրվել է նաև սպանության 2 դեպք (2021 թվականին՝ յոթ դեպք)։
Մարզի դատախազի խոսքով՝ սեփականության դեմ ուղղված հանցագործությունները նվազել են։
«2022 թվականին արձանագրվել է 808 դեպք (2021 թվականին՝ 815 դեպք)։ Նվազել են ավազակության, գողության դեպքերը, սակայն 21–ով աճել է բնակարանային գողությունների թիվը՝ կազմելով 76 (2021 թվականին արձանագրվել է 55 դեպք)։ Մարզում 2022 թվականին աճել են թմրամիջոցների ապօրինի շրջանառության դեպքերը՝ հասնելով 83–ի (2021 թվականին արձանագրվել է 77 դեպք):
Սյունիքի մարզի դատախազ Մասիս Պողոսյանը տեղեկացրել է, որ 2022–ի ընթացքում մարզում հանցագործությունների 977 դեպք է արձանագրվել(2021 թվականին՝ 896)։ 2022 թվականին 45–ովաճել է առանձնապես ծանր հանցագործությունների դեպքերի քանակը՝ կազմելով 206 (2021 թվականին՝ 161), միջին ծանրության դեպքերի թիվը՝ կազմելով 299 (2021 թվականին՝ 213 դեպք)։ Սեփականության դեմ ուղղված հանցագործությունների 323 դեպք է արձանագրվել (2021 թվականին՝ 317)։ Բնակարանային գողությունների դեպքերն աճել են, նվազել են խարդախության, ավազակության, կողոպուտի դեպքերը։
Պողոսյանը նշել է, որ 2022 թվականին արձանագրվել է թմրամիջոցների ապօրինի շրջանառության 24 դեպք, (2021 թվականին՝ 32 դեպք), այդ թվում՝ իրացման 10 դեպք։