Կոպիրկինն ասել է` ինչ նպատակ է հետապնդում Մակրոնի հայտարարությունը Կովկասում ՌԴ դերի մասին

ԵՐԵՎԱՆ, 22 փետրվարի – Sputnik. Հայաստանում Ռուսաստանի դեսպան Սերգեյ Կոպիրկինը 24News-ին տված հարցազրույցում կոնյուկտուրային է անվանել Ֆրանսիայի նախագահի արտահայտությունները Հարավային Կովկասում «Ռուսաստանի ապակառուցողական դերի» և նրա «նեոգաղութատիրական քաղաքականության» մասին:

Ավելի վաղ Էմանուել Մակրոնը Մյունխենի անվտանգության համաժողովում Ռուսաստանին մեղադրել էր նեոգաղութատիրության մեջ՝ ասելով, որ Մոսկվան չի կարող նպաստել Կովկասում մարտահրավերների հաղթահարմանը: Մակրոնի խոսքով՝ ինքը դա ասում է իր ընկերոջ՝ վարչապետ Նիկոլ Փաշինյանի ներկայությամբ, որին Ֆրանսիան շարունակելու է աջակցել ու նրա հետ միասին գործել։

«Ֆրանսիայի ղեկավարությունը պետք է լավ հասկանա կարգավորման ողջ գործընթացի նպատակներն ու մեխանիզմը, ինչպես նաև այն, թե ինչպես է Ռուսաստանն աշխատում այդ ոլորտում։ Այդ հայտարարություններն ինձ համար որոշակի կոնյուկտուրային բնույթ ունեն։ Դրանք կապված են ոչ թե այն ամենի հետ, ինչ անում է Ռուսաստանը, այլ այն դիմակայության հետ, որը Ռուսաստանին պարտադրված է Արևմուտքի կողմից»,–նշել է Կոպիրկինը։

Ինչ վերաբերում է Ռուսաստանի նեոգաղութատիրական նկրտումներին, ապա, ըստ Կոպիրկինի, կրկին տարօրինակ է դա լսել մի երկրի առաջնորդից, որը շատ հայտնի է իր գաղութային անցյալով և այժմ պատկանում է այն ճամբարին, որն բացահայտ նեոգաղութատիրական քաղաքականություն է վարում կամ համենայնդեպս ակտիվորեն փորձում է դա անել։

Նա հիշեցրել է, որ ռուսական ռազմական ներկայությունը Հայաստանում մնում է կայունության պահպանման և ավելի մեծ էսկալացիա թույլ չտալու առանցքային գործոնը:

Կոպիրկինին մտահոգում է այն, որ Արևմուտքը փորձում է Հարավային Կովկասի տարածաշրջանը վերածել աշխարհաքաղաքական առճակատման դաշտի, ինչը նախկինում ընդհանրապես չի եղել։ Մակրոնի մյունխենյան հայտարարությունն այս իմաստով կարծես Հարավային Կովկասում Ռուսաստանի հետ աշխարհաքաղաքական մարտ կազմակերպելու փորձ է։