ԵՐԵՎԱՆ, 18 փետրվարի - Sputnik. ՀՀ վարչապետ Նիկոլ Փաշինյանը ՀՀ կառավարության և Եվրոպական ներդրումային բանկի միջև համագործակցության ու տարբեր ոլորտներում իրականացվող համատեղ ներդրումային ծրագրերի մասին քննարկում է ունեցել ԵՆԲ նախագահ Վերներ Հոյերի հետ: Այս մասին հայտնում է ՀՀ վարչապետի մամուլի ծառայությունը։
Նիկոլ Փաշինյանն ընդգծել է, որ ԵՆԲ-ի հետ գործակցությամբ կյանքի կոչվող ծրագրերը մեծ նշանակություն ունեն մեր երկրի գործարար շրջանակների և քաղաքացիների համար, քանի որ դրանք ուղղված են մասնավոր հատվածի ֆինանսավորմանը, տարբեր ենթակառուցվածքային հանգույցների բարելավմանը:
Վարչապետը նաև նշել է, որ ՀՀ կառավարությունը շահագրգռված է ԵՆԲ-ի հետ քննարկելունոր ծրագրեր իրականացնելու հնարավորությունները:
Վերներ Հոյերն արդյունավետ է գնահատել ՀՀ կառավարության հետ համագործակցությունը և նշել, որ ԵՆԲ-ն պատրաստ է քննարկել հայ գործընկերների հետ տարբեր ուղղություններով նոր նախագծերի իրականացման հնարավորությունները:
Այնուհետև վարչապետ Նիկոլ Փաշինյանը հանդիպել է ՆԱՏՕ-ի նախկին գլխավոր քարտուղար Անդերս Ֆոգ Ռասմուսենի հետ:
Նիկոլ Փաշինյանն ու ՆԱՏՕ-ի նախկին գլխավոր քարտուղար Անդերս Ֆոգ Ռասմուսենը
Զրուցակիցները քննարկել են Հարավային Կովկասի տարածաշրջանում տեղի ունեցող զարգացումներն ու կարևորել կայունության ու խաղաղության ամրապնդման ուղղությամբ հետևողական քայլերի իրականացումը:
Հիշեցնենք` Փաշինյանը տիկնոջ՝ Աննա Հակոբյանի հետ փետրվարի 16-19-ն աշխատանքային այցով կլինի Գերմանիայում։ Մյունխենում նա ոչ ֆորմալ հանդիպում է ունեցել Եվրոպական խորհրդի նախագահ Շառլ Միշելի հետ, հանցավորության դեմ պայքարի հարցեր քննարկել Եվրոպոլի գործադիր տնօրեն Քեթրին դը Բոլի հետ։ Համաժողովի շրջանակում Փաշինյանը հանդիպել է նաև Իրաքի Հանրապետության վարչապետ Մոհամմեդ Շիա Սուդանի, Ֆրանսիայի նախագահ Էմանուել Մակրոնի հետ։ Նիկոլ Փաշինյանը Մյունխենում շփում է ունեցել նաև Եվրահանձնաժողովի նախագահ Ուրսուլա Ֆոն դեր Լայենի ու ԵԱՀԿ գլխավոր քարտուղար Հելգա Շմիդտի հետ։ Նա Լատվիայի նախագահ Էգիլս Լևիցի հետ խոսել է Հայաստանում Եվրոպական միության քաղաքացիական առաքելության գործունեության կարևորության մասին։
Նիկոլ Փաշինյանը Մյունխենում արդեն հանդիպել է նաև Խորվաթիայի վարչապետ Անդրեյ Պլենկովիչի, ԵԱՀԿ Մինսկի խմբի ԱՄՆ համանախագահ Լուիս Բոնոյի հետ։
Երկկողմ հանդիպումներից բացի կայացել է նաև եռակողմ հանդիպում ԱՄՆ պետքարտուղար Էնթոնի Բլինկենի ու Ադրբեջանի նախագահ Իլհամ Ալիևի հետ։