Նախորդ տարի ընտանեկան բռնության դեպքերով վարույթների թիվը զգալիորեն ավելացել է

ԵՐԵՎԱՆ, 15 փետրվարի – Sputnik. 2022թ–ի ընթացքում ՀՀ քննչական կոմիտեի վարույթում քննվել է ընտանեկան բռնության վերաբերյալ 960 քրեական վարույթ։ Տեղեկությունը հայտնում է ՀՀ քննչական կոմիտեն։

Նշենք, որ 2021-ին ՔԿ վարույթում քննվել է ընտանեկան բռնության վերաբերյալ 556 քրգործ։

Ի դեպ, նախորդ տարվա 960 քրգործերից 122-ն ավարտվել է մեղադրական եզրակացությամբ և 126 անձի վերաբերյալ ուղարկվել է դատարան։ Իսկ 301 քրեական վարույթ կարճվել է, ևս 383 քրեական վարույթ փոխանցվել է 2023թ–ի հունվար ամիս։

Դատարան ուղարկված վարույթներից ամենաշատը եղել են ֆիզիկական ներգործության կամ ֆիզիկական ուժեղ ցավ կամ հոգեկան ուժեղ տառապանք պատճառելու դեպքերով։ Բացի այդ, 9 դեպք եղել է սպանության հատկանիշներով, ինչպես նաև 2 դեպք է գրանցվել 16 տարին չլրացած անձի նկատմամբ սեքսուալ բնույթի գործողություններ կատարելու հատկանիշներով։ Եղել են նաև մարդուն առևանգելու, ալիմենտ վճարելուց խուսափելու և այլ հանցագործություններ:

Դատարան ուղարկված վարույթներով 125 մեղադրյալներից 108-ը հանդիսացել են ամուսիններ, 4-ը՝ տատ կամ պապ, 5-ը՝ քույր կամ եղբայր, 8-ը՝ զավակ կամ թոռ:

Հիշեցնենք, որ նախորդ տարի ընտանիքում տեղի ունեցած հանցագործություններից 19-ը կատարվել են մոր կողմից, որից 12-ը` անչափահաս զավակի նկատմամբ, 27-ը՝ հոր կողմից, որից 16-ը` անչափահաս զավակի նկատմամբ,և այլն: