ՀՀ–ն ՌԴ գործընկերների հետ քննարկում է բոլոր խնդիրները. Գրիգորյանը` ԵՄ առաքելության մասին

ԵՐԵՎԱՆ, 14 փետրվարի – Sputnik. Հայաստանը Ռուսաստանի Դաշնության գործընկերներին ներկայացրել է այն պատճառները, որոնց համար հրավիրել է ԵՄ առաքելությանը, լրագրողների հետ ճեպազրույցում ասաց Հայաստանի անվտանգության խորհրդի քարտուղար Արմեն Գրիգորյանը։

Նրա խոսքով` ԵՄ քաղաքացիական առաքելության ժամանումը փոխկապակցված է 2021-2022 թվականներին Հայաստանի վրա Ադրբեջանի հարձակման հետ։

Նա նշեց, որ երաշխիքները միշտ չէ, որ ռազմական են, երբեմն դրանք կարող են ապահովել նույնիսկ տնտեսական հարաբերությունները։ Եվ այս առումով քաղաքացիական առաքելությունը լրացուցիչ երաշխիքներ է ստեղծում։

Խոսելով Մոսկվայի բացասական դիրքորոշման մասին՝ ԱԽ քարտուղարը նշեց, որ Հայաստանը պարբերաբար քննարկում է Ռուսաստանի հետ բոլոր խնդրահարույց հարցերը։

«Հայաստանը ՌԴ գործընկերների հետ պարբերաբար քննարկում է այն բոլոր խնդիրները, որոնք գոյություն ունեն, և ներկայացնում է հայկական կողմի դիրքորոշումները, թե ինչու են այս կամ այն քայլերը կատարել։ 2021 թվականի մայիսին և նոյեմբերին, 2022 թվականի սեպտեմբերին Հայաստանի սուվերեն տարածքի նկատմամբ Ադրբեջանի կողմից հարձակում եղավ, տարածքներ օկուպացվեցին, և այդ վտանգը շարունակում է մնալ։ Այդ սպառնալիքը չեզոքացնելու համար Հայաստանին անհրաժեշտ է որոշակի միջազգային երաշխիքներ ստեղծել, որի ուղղությամբ էլ աշխատում ենք»,–ասաց նա։

Ավելի վաղ ՌԴ ԱԳՆ-ն հայտարարել էր, որ ԵՄ դիտորդների հայտնվելը կարող է աշխարհաքաղաքական առճակատում բերել հարավկովկասյան տարածաշրջան։

Հիշեցնենք, որ հունվարի 23-ին ԵՄ երկրների ԱԳ նախարարները հավանություն են տվել երկամյա մանդատով Հայաստան գործուղվող քաղաքացիական նոր առաքելության ձևավորմանը։

Հայաստանում ԵՄ երկարաժամկետ քաղաքացիական առաքելությունը, որի կազմում կլինեն 8 ժանդարմներ Ֆրանսիայից, կներառի մոտ 100 մարդ, այդ թվում՝ փորձագետներ և եվրոպացի դիտորդներ։

Առաքելության նպատակն է Հայաստանի սահմանամերձ շրջաններում կայունության խթանումը, տեղում վստահության ձևավորումը և Հայաստանի և Ադրբեջանի միջև հարաբերությունների կարգավորմանն ուղղված ջանքերի համար նպաստավոր պայմանների ապահովումը։

Այն կսկսի աշխատանքը փետրվարի 20-ից, ։