ԵՐԵՎԱՆ, 14 փետրվարի – Sputnik. Հայաստանը շարունակում է աշխատել, որպեսզի միջազգային տեսանելի մեխանիզմի շրջանակում քննարկումներ լինեն Ստեփանակերտի և Բաքվի միջև։ Լրագրողների հետ ճեպազրույցում տեղեկությունը հայտնեց ՀՀ անվտանգության խորհրդի քարտուղար Արմեն Գրիգորյանը։
«Հայաստանը կողմ է, որպեսզի միջազգային տեսանելի մեխանիզմի շրջանակում քննարկումներ լինեն Ստեփանակերտի և Բաքվի միջև, և շարունակում է աշխատել իր միջազգային գործընկերների հետ, որպեսզի այդ մեխանիզմը կայանա։ Սրան կարող է անդրադարձ լինել խաղաղության պայմանագրում, որի շուրջ բանակցություններ են ընթանում։ Այն կարող է լինել միջազգային կառույցների կամ այլ ֆորմատով, դա հստակ չէ։ Սա քննարկման առարկա է, որը պետք է շարունակենք հստակեցնելու համար։ Այս ամենը ևս մեկ անգամ ցույց է տալիս, որ Հայաստանը կողմ է հստակեցումներին»,– ասաց ԱԽ քարտուղարը։
Լրագրողները հետաքրքրվեցին, թե հայկական կողմն ինչ կետեր է ներառում խաղաղության պայմանագրում։
«Ոչ թե ինչ կետեր են ներառվում, այլ կարող եմ ասել Հայաստանի մոտեցումը։ Այն շարունակում է մնալ այն, որ միջազգային տեսանելի մեխանիզմ պետք է ստեղծվի, որ Ստեփանակերտի և Բաքվի միջև տեղի ունենան քննարկումներ` ԼՂ–ում ապրող հայերի անվտանգության, իրավունքների շուրջ»,– պատասխանեց նա։
Գրիգորյանն ընդգծեց, որ այդ բոլոր գործընթացների շրջանակում պետք է նաև հասկանալ, թե որոնք են այն մեխանիզմները, որ երաշխավորում են անվտանգությունն ու իրավունքները։
Հիշեցնենք, որ 2021 թվականին Ադրբեջանի նախագահ Իլհամ Ալիևը հայտարարել էր Հայաստանի հետ խաղաղության պայմանագիր ստորագրելու պատրաստակամության մասին։ 2022 թվականի մարտին Բաքուն Երևանին էր փոխանցել հարաբերությունների կարգավորման վերաբերյալ հինգ կետից բաղկացած իր առաջարկը: Հայկական կողմը շտկումներ է ավելացրել և ուղարկել իր տարբերակը։ Այդ ժամանակից ի վեր կողմերի միջև տարբեր մակարդակներով բանակցությունների մի քանի փուլ է եղել։