Իրանի նախագահը եռօրյա այցով մեկնում է Չինաստան

ԵՐԵՎԱՆ, 12 փետրվարի - Sputnik. Իրանի նախագահ Սեյեդ Էբրահիմ Ռայիսին փետրվարի 13-ին եռօրյա այցով կմեկնի Պեկին։ Տեղեկությունը հայտնում է IRNA գործակալությունը։

Ռայիսին նախատեսում է երկկողմ հանդիպում անցկացնել ՉԺՀ նախագահի հետ։ Օրակարգում են նաև երկու երկրների բարձրաստիճան պատվիրակությունների բանակցությունները և համագործակցության փաստաթղթերի ստորագրումը։

Իրանի կառավարության ղեկավարը կմասնակցի երկու երկրների գործարարների համատեղ հանդիպմանը, կհանդիպի նաև Չինաստանում բնակվող իրանցիների, տեղի մտավորականների հետ։

Չինաստանը, ըստ Իսլամական Հանրապետության մաքսային ծառայության տվյալների, Իրանի խոշորագույն առևտրային գործընկերն է։

Իրանից Չինաստան արտահանման ծավալը 2022 թվականին կազմել է 12 միլիարդ 600 միլիոն դոլար։ Իրանը Չինաստանից ներմուծել է 12 միլիարդ 700 միլիոն դոլար արժողությամբ ապրանքներ: