ԵՐԵՎԱՆ, 12 փետրվարի – Sputnik. Եվրախորհրդարանի ֆրանսիացի պատգամավոր, Եվրախորհրդարանում «Les Républicains - LR» կուսակցության պատվիրակության ղեկավար Ֆրանսուա-Քզավիե Բելամինն այցելել է Սյունիքի մարզ։ Տեղեկությունը հայտնում է Սյունիքի մարզպետարանի մամուլի ծառայությունը։
Բելամինը Գորիսում հանդիպել է մարզպետ Ռոբերտ Ղուկասյանին։
Ֆրանսուա-Քզավիե Բելամինն այցելել է Սյունիքի մարզ
Մարզպետը նրան ուղեկցել է Հայաստանը Արցախին կապող ճանապարհի սահմանային անցակետ, որտեղ Բելամինն արձանագրել է, որ Արցախ–Հայաստան ճանապարհը փակ է։ Պատգամավորը նաև հանդիպել է ճանապարհի փակ լինելու պատճառով Գորիսում ժամանակավորապես ապաստանած արցախցիների հետ։
Պաշտոնյաները նաև առանձնազրույց են ունեցել, որի ընթացքում ֆրանսիացի հյուրը Ղուկասյանից տեղեկացել է մարզում ստեղծված կացության մասին։
«Պարոն Բելամինն Սյունիք է եկել, որպեսզի անձամբ տեսնի այնտեղ կատարվողը, քանի որ առաջիկայում Եվրախորհրդարանում պետք է ելույթ ունենա Բերձորի միջանցքի փակ լինելու և դրա հետևանքների թեմայով։ Նրան հետաքրքրում էր թե՛ Սյունիքի սահմանների, թե՛ Արցախ-Հայաստան ճանապարհի իրավիճակը»,– ասված է հաղորդագրությունում։
Գորիսում բնակվող արցախցիները պատգամավորին ներկայացրել են իրենց ցանկությունը՝ վերադառնալ հայրենիք՝ չնայած այնտեղ ներկայում առկա ծանր սոցիալ-տնտեսական կացությանն ու հումանիտար ճգնաժամին։
Հիշեցնենք` դեկտեմբերի 12-ից Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։ Դեկտեմբերի 13-ից ադրբեջանական կողմը ժամանակ առ ժամանակ անջատում է Արցախի գազամատակարարումը։
Հունվարի 9-ից ադրբեջանական վերահսկողության տակ գտնվող տարածքից անջատվել է նաև Հայաստանից դեպի Արցախ էներգասնուցումը: Ադրբեջանական կողմը հնարավորություն չի տալիս, որ մասնագետները մոտենան և հասկանան պատճառները՝ անհրաժեշտության դեպքում վթարավերականգնողական աշխատանքներ իրականացնելու համար: Արցախում էլենտրաէներգիայի մատակարարումն իրականացվում է հովհարային անջատումներով։
Լաչինի միջանցքը շարունակում է փակ մնալ։