Թուրքիայի Իսկենդերունի նավահանգստից դեռ ծուխ է բարձրանում։ Տեղեկությունը հայտնում է RT–ն։
ԶԼՄ–ի տվյալով` կրակն այժմ մեկուսացվել է։ Մարման աշխատանքներին ներգրավվել է ՌԴ ԱԻՆ Բե-200 ինքնաթիռը։
Հիշեցնենք` մի քանի հարկով դասավորված բեռնարկղերի արտաքին շարքերը փետրվարի 6-ի երկրաշարժի ժամանակ կույտի էին վերածվել, այդ պատճառով նավահանգստի աշխատանքը դադարեցվել էր։ Երեկոյան բեռնարկղերը սկսել էին այրվել։ Հրդեհի պատճառը դեռ հայտնի չէ։
Փետրվարի 7-ին կրակը տարածվել էր մի քանի հարյուր քմ–ի վրա։ Խոշոր ընկերություններն այդ նավահանգիստ ուղևորվող իրենց բեռնարկղերը սկսել էին այլ կետեր ուղարկել։
Թուրքիայի պաշտպանության նախարարությունը փետրվարի 7-ին հայտնեց, որ հրդեհը մարվել է, սակայն հետ փոխեց հաղորդագրության տեքստը` նշելով, որ կրակի դեմ պայքարը շարունակվում է ավիացիայի գործարկմամբ: Փետրվարի 8-ի երեկոյան Ստամբուլի քաղաքապետ Էքրեմ Իմամօղլուն նույնպես հայտնեց, որ հրդեհը մարվել է, սակայն, դատելով կադրերից, դեռ անելիք կա։
Իսկենդերունը Արևելյան Միջերկրական տարածաշրջանի ամենախոշոր նավահանգիստն է, որը նավթատար լցանավեր, չորաբեռներ և բեռնարկղեր տեղափոխող նավեր է ընդունում: