ԵՐԵՎԱՆ, 7 փետրվարի – Sputnik. «Հայաստան» խմբակցությունը կդիմի պատգամավորական էթիկայի հանձնաժողով ստեղծելու միջնորդությամբ։ Ազգային ժողովում այս հայտարարությունն արեց խմբակցության պատգամավոր Լիլիթ Գալստյանը։
«Ապրում ենք մի իրականության մեջ, երբ հակաղարաբաղցիական քարոզը քրեականացնելը դառնում է ակտուալ։ Ձեր օրոք կարծես ակտուալ է դառնում ցեղասպանության ուրացման քրեականացումը»,–ասաց Գալստյանը` դիմելով իշխանությանը։
Նա հիշեցրեց` ՔՊ–ական պատգամավոր Գուրգեն Արսենյանի հայտարարություններից հետո ԱԺ խմբակցությունները հայտնել են, որ պետք է այդ հարցը քննվի էթիկայի հանձնաժողովում։ «Հայաստան» խմբակցությունը համոզված է, որ ինչպես վերոհիշյալ, այնպես էլ մի շարք այլ դեպքերում ակնհայտորեն պատգամավորական վարքագծի խնդիր կա։
Հիշեցնենք, որ Արսենյանն ԱԺ–ում հայտարարել էր. «Անընդհատ ասում են Ղարաբաղի 120 000 բնակիչ… ՀՀ 3 մլն բնակչի համար ենք պատասխանատու, պատասխանատու ենք մեր երկրի համար, առաջնահերթությունները ճիշտ դրեք»։
ԱԺ կանոնակարգի համաձայն` էթիկայի հանձնաժողով կարող է ձևավորվել, եթե որևէ խմբակցություն կոնկրետ դեպքի կապակցությամբ հանդես գա էթիկայի հանձնաժողով ստեղծելու նախաձեռնությամբ։