ԵՐԵՎԱՆ, 7 փետրվարի – Sputnik. «Եվրատեսիլ-2023» երգի մրցույթում Վրաստանը ներկայացնող 22-ամյա հայազգի երգչուհի Իրու Խեչանովան հայտնվել է սկանդալի կենտրոնում։ Տեղեկությունը հայտնում է Sputnik Գրուզիան։
Նրան մեղադրում են «Voice» նախագծի եզրափակիչի արդյունքները կեղծելու մեջ։
Նախագծի ավարտից հետո տարբեր օգտատերեր մեկնաբանություններ են գրել, որ Խեչանովայի հաղթանակը նախապես ծրագրված է եղել։ Ավելի ուշ «Georgian Times» հեռուստաալիքը ձայնագրություն է հրապարակել է, որում իբր նախագծի կազմակերպիչներից Դավիթ Եվգենիձեն ասում է, որ ողջ թիմը «լրջորեն աշխատում է», որպեսզի Խեչանովան հասնի եզրափակիչ և հաղթի։
Իրավիճակը դեռ չեն մեկնաբանել ո՛չ վրացական Առաջին ալիքի ներկայացուցիչները, որով հեռարձակվել է շոուն, ո՛չ էլ Խեչանովան։
Հիշեցնենք` երգչուհին մայիսի 11-ին պետք է ելույթ ունենա «Եվրատեսիլի» երկրորդ կիսաեզրափակիչում։ Թե ինչ երգ է նա ներկայացնելու, դեռ հայտնի չէ։
Խեչանովան եղել է «Candy» խմբի անդամ, որը Վրաստանին երկրորդ հաղթանակն է բերել 2011 թվականին Երևանում կայացած «Մանկական Եվրատեսիլ» երգի մրցույթում։ Երգչուհին հաղթել է նաև վրացական «Ձայնը» նախագծում։
Խեչանովան Թբիլիսիից է։ 2007 թվականից սովորում է Գոգի Դոլիձեի անվան արվեստի դպրոցում (դաշնամուրի բաժին)։ Նա մասնակցել է մի շարք երաժշտական մրցույթների։ 2009 թվականին Թբիլիսիի 2-րդ երաժշտական օլիմպիադայում գրավել է առաջին տեղը՝ դառնալով լավագույն կատարող։
Հիշեցնենք, որ «Եվրատեսիլ-2023»-ը կանցկացվի Լիվերպուլում մայիսի 9-ից 13-ը։
Հայաստանը մրցույթում կներկայացնի երգչուհի Բրյունետը` Էլեն Երեմյանը, որը նույնպես ելույթ կունենա երկրորդ կիսաեզրափակիչում: