ԵՐԵՎԱՆ, 5 փետրվարի – Sputnik. Երկարատև հիվանդությունից հետո 79 տարեկանում այսօր մահացել է Պակիստանի նախկին նախագահ Փերվեզ Մուշարաֆը։ Տեղեկությունը հայտնում է Geo News հեռուստաալիքը՝ հղում անելով նախկին նախագահի ընտանիքի ներկայացուցիչներին:
Նշվում է, որ Մուշարաֆն ամիլոիդոզի բարդացման պատճառով Դուբայի հիվանդանոցում է եղել։ Ամիլոիդոզը հիվանդություն է, որի դեպքում օրգանիզմում նյութափոխանակության խափանում է տեղի ունենում:
Պակիստանի նախկին նախագահ Փերվեզ Մուշարաֆը ծնվել է 1943 թվականի օգոստոսի 11-ին Դելիում (Հնդկաստան, այդ ժամանակ բրիտանական գաղութ էր)։ 1947 թվականին ընտանիքի հետ տեղափոխվել է Կարաչի քաղաք։ 1965 և 1971 թվականներին հնդկա-պակիստանյան հակամարտությունների մասնակից է եղել: 1991 թվականին ստացել է գեներալի կոչում, 1998 թվականին գլխավորել է Գլխավոր շտաբը, այնուհետև դարձել Պակիստանի շտաբի պետերի միացյալ կոմիտեի նախագահ և Պակիստանի բանակի գլխավոր հրամանատար։
1999 թվականի հոկտեմբերի 12-ին Փերվեզ Մուշարաֆը իշխանության է եկել անարյուն հեղաշրջման և Պակիստանի վարչապետ Նավազ Շարիֆի պաշտոնանկության արդյունքում։ Նույն թվականի հոկտեմբերի 14-ին Պակիստանում մտցվեց արտակարգ դրություն, լուծարվեցին խորհրդարանն ու ազգային ժողովը, դադարեցվեց Սահմանադրության գործողությունը։ Գեներալ Մուշարաֆը հռչակվեց գործադիր իշխանության ղեկավար։ 2001 թվականի հունիսին նա ստանձնեց Պակիստանի նախագահի լիազորությունները հինգ տարի ժամկետով՝ պահպանելով գործադիր իշխանության և զինված ուժերի ղեկավարի պաշտոնները։