ԵՐԵՎԱՆ, 3 փետրվարի – Sputnik. Ռուսաստանի Դաշնությունում Հայաստանի Հանրապետության դեսպան Վաղարշակ Հարությունյանն այսօր հանդիպել է Վոլգոգրադի մարզի հայ համայնքի ներկայացուցիչների հետ։ Տեղեկությունը հայտնում է ՌԴ–ում ՀՀ դեսպանության մամուլի ծառայությունը։
Դեսպանը կարևորել է երկկողմ միջտարածաշրջանային համագործակցությանն ուղղված նախագծերում և նախաձեռնություններում համայնքի ակտիվ մասնակցության դերը։
Նա այցելել է նաև տեղի Սուրբ Գևորգ հայկական եկեղեցի։
Դեսպանը Վոլգոգրադի մարզ կատարած այցի շրջանակներում հանդիպել է նաև Վոլգոգրադի մարզի ղեկավար Անդրեյ Բոչարովի հետ։
«Նա շնորհակալություն է հայտնել Ստալինգրադի ճակատամարտում հաղթանակի 80-ամյակին նվիրված միջոցառումներին մասնակցելու հրավերի համար և ընդգծել երկու երկրների միջտարածաշրջանային փոխգործակցության շրջանակում Հայաստանի մարզերի և Վոլգոգրադի մարզի միջև կառուցողական համագործակցության հետագա զարգացման կարևորությունը»,– ասված է հաղորդագրությունում։
Հանդիպման ընթացքում քննարկվել են գործունեության տարբեր ոլորտներում կապերի և փոխգործակցության ընդլայնման հարցեր` առևտրատնտեսական և հումանիտար կապերի զարգացմանն ուղղված նախագծերի իրականացման շուրջ։