ԵՐԵՎԱՆ, 3 փետրվարի – Sputnik. ՀՀ քննչական կոմիտեն թմրամիջոցի ապօրինի շրջանառության դեպք է բացահայտել։ Տեղեկությունը հայտնում է ՔԿ–ի մամուլի ծառայությունը։
Ըստ հաղորդագրության` փետրվարի 2-ին՝ ժամը 12:40-ին, ապօրինի թմրամիջոցներ ձեռք բերելու, պահելու և իրացնելու կասկածանքով Երևանի Մոլդովական փողոցում ձերբակալվել և ոստիկանության Նոր Նորքի բաժին է տեղափոխել Երևան քաղաքի՝ 1996թ. ծնված բնակիչ:
Նրա անձնական խուզարկությամբ հայտնաբերվել է ընդհանուր մոտ 26.9 գրամ քաշով, նախնական տվյալներով, «Մարիխուանա» տեսակի թմրամիջոցի նմանվող դեղնականաչավուն զանգվածի 30 հատ փաթեթ։
Իրականացված միջոցառումների արդյունքում պարզվել է, որ հիշյալ երիտասարդը Նոր Նորք վարչական շրջանի տարբեր հատվածներում արդեն իսկ տեղադրել է «Մարիխուանա» տեսակի թմրամիջոցի թվով 5 հատ փաթեթ, որոնք պետք է իրացվեին «Տելեգրամ» հավելվածում գրանցված էջի միջոցով։
Դեպքի առթիվ ՀՀ քրեական օրենսգրքի 393-րդ հոդվածի 2-րդ մասի 2-րդ և 3-րդ կետերով (թմրամիջոցների շրջանառությունը շահադիտական դրդումներով, խոշոր չափերով) նախաձեռնվել է քրեական վարույթ: Կատարվում է նախաքննություն:
Ձեռնարկվում են միջոցառումներ թմրամիջոցը ձեռք բերելու աղբյուրը, թմրամիջոցի ապօրինի շրջանառությանը մասնակից այլ անձանց շրջանակը պարզելու համար: