ԵՐԵՎԱՆ, 2 փետրվարի – Sputnik. Դպրոցաշինության վարկային և դրամաշնորհային ծրագրերի իրականացման գործընթացում խոշոր չարաշահումներ են տեղի ունեցել, ինչի հետևանքով 173 մլն 965 հազար դրամի վնաս է պատճառվել, հայտնում է դատախազությունը։
Նշվում է, որ ուսումնասիրվել է Հաշվեքննիչ պալատի կողմից «Դպրոցների սեյսմիկ անվտանգության մակարդակի բարձրացման վարկային և դրամաշնորհային ծրագրերի» հաշվեքննության արդյունքների վերաբերյալ ընթացիկ եզրակացությունը: Խախտումներ են հայտնաբերվել նախագծերի մշակման և հեղինակային հսկողության ծառայություններ մատուցելու համար 2017-2019թթ. պայմանագրերի կնքման և կատարման գործընթացում: Ի դեպ, ծրագիրն իրականացվել է Հայաստանի տարածքային զարգացման հիմնադրամի կողմից՝ Ասիական զարգացման բանկի աջակցությամբ:
«Պարզվել է, որ 300 փորձագետներ պայմանագրերը կնքելու պահին և դրանց կատարման ընթացքում ընկերությունների աշխատողներ չեն եղել և հիմնադրամին ներկայացրել են կեղծ տեղեկություններ: Իսկ հիմնադրամի պաշտոնատար անձինք, չստուգելով ընկերությունների տեղեկությունները, ընկերություններին վճարել են 125 մլն 872 հազար դրամ»,–ասված է հաղորդագրության մեջ։
Բացի այդ, խախտում է արձանագրվել նաև տեխնիկական հսկողության պայմանագրերի կնքման և կատարման ընթացքում։ Այսինքն` ծառայություններ չմատուցած որոշ փորձագետներ հիմնադրամի կողմից ստացել են 10 մլն 809 հազար դրամ: Իսկ հիմնադրամի պաշտոնատար անձինք լիցենզիա չունեցող ֆիզիկական անձանց հետ կնքել են պայմանագրեր, որ իբրև թե ինչ–ինչ գործերով զբաղվեն և հափշտակել 37 մլն 284 հազար դրամը:
Հակակոռուպցիոն կոմիտեում նախաձեռնվել է քրեական վարույթ նախկին ՀՀ քրեական օրենսգրքի 179-րդ հոդվածի 3-րդ մասի 1-ին կետով (հանցավորին վստահված՝ առանձնապես խոշոր չափերով գույքի հափշտակությունը), 308-րդ հոդվածի 2-րդ մասով (պաշտոնեական դիրքը ծառայության շահերին հակառակ օգտագործելը), 314-րդ հոդվածի 1-ին մասով (պաշտոնական փաստաթղթերում ակնհայտ կեղծ տեղեկություններ կամ գրառումներ մտցնելը):