Սուրեն Պապիկյանն առանձնազրույցներ է ունեցել սպաների ու սերժանտների հետ

ԵՐԵՎԱՆ, 1 փետրվարի – Sputnik. Յուրաքանչյուր զինծառայող, լինի սպա թե ժամկետային, խորապես պետք է գիտակցի, որ ինքը հայրենիքի պաշտպանության գործում ունի իր մասնաբաժինը։ Սպայական և կրտսեր հրամանատարական կազմի ներկայացուցիչների հետ առանձնազրույցներում այս հայտարարությունն է արել ՀՀ պաշտպանության նախարար Սուրեն Պապիկյանը։ Տեղեկությունը հայտնում է գերատեսչության մամուլի ծառայությունը։

Ավելի վաղ տեղեկացրել էինք, որ Պապիկյանն այսօր անակնկալ այցով եղել է ՊՆ N զորամասում՝ հետևելով օրվա կարգացուցակով սահմանված ծառայության կազմակերպմանը։

Զրուցելով կրտսեր հրամանատարական կազմի շարքերը վերջերս համալրած սերժանտների հետ` նախարարը նշել է, որ չափազանց կարևոր է նրանց դերն ու առաքելությունը ինչպես նորեկներին սովորեցնելու, կրթելու, այնպես էլ նրանց ու սպայակազմի միջև կապող օղակ դառնալու առումով։

Հանդիպումների ընթացքում նախարարը վստահեցրել է, որ բոլոր խնդիրներին, որոնք անմիջական զրույցի ընթացքում բարձրաձայնել են զինծառայողները, լուծումներ կտրվեն։

Հիշեցնենք` Պապիկյանն ասել էր, որ զորամասեր անակնկալ այցելելը շարունակական բնույթ է կրելու։