ԵՐԵՎԱՆ, 1 փետրվարի – Sputnik. Ադրբեջանի ՆԳՆ–ն հայտնել է, որ Իրանի հատուկ ծառայություններում աշխատելու կասկածանքով ձերբակալվել է 39 մարդ։
Նշվում է, թե այդ անձինք ներկայացել են որպես հավատացյալներ, սոցցանցերում Իրանի օգտին քարոզչություն իրականացրել, ինչպես նաև չարաշահել են Ադրբեջանում կրոնական ազատությունը։ Նրանք նաև իրանական հատուկ ծառայությունների հանձնարարած խնդիրներն են կատարել, որպեսզի խաթարեն Ադրբեջանում ձևավորված հանդուրժողականության ավանդույթները։
«Հավաքած տեղեկությունները նրանք փոխանցել են Իրանի հատուկ ծառայություններին, որոնցից ստացել են առաջադրանքները»,– հայտնում են ԶԼՄ–ները։
Հիշեցնենք, որ հունվարի 31-ին Ադրբեջանի ՆԳՆ–ն 7 մարդու էր ձերբակալել Իրանի համար աշխատելու կասկածանքով։ Նշվում էր, որ ուժայինների գործողությունն իրականացվել է, այդ թվում` SalamNews լրատվական գործակալությունում և Interaz հեռուստաալիքում։