ԵՐԵՎԱՆ, 31 հունվարի – Sputnik. Կ. Ստանիսլավսկու անվան ռուսական դրամատիկական թատրոնի թատերաշրջանը շատ հագեցած է լինելու. թատերախումբն աննախադեպ թվով պրեմիերաներ է պատրաստում։ Այսօր հրավիրված ասուլիսի ժամանակ այս հայտարարությունն արեց թատրոնի տնօրեն Մարիաննա Մխիթարյանը։
Նրա խոսքով՝ այժմ վեց ներկայացման փորձեր են անում, իսկ պրեմիերաները կներկայացվեն արդեն մարտի վերջից` ամսի 24-25-26-ին տեղի կունենա «Բալզամինովի ամուսնությունը» (ըստ Ալեքսանդր Օստրովսկու պիեսի) ներկայացման առաջնախաղը։
«Այս տարի Օստրովսկու 200-ամյակն է նշվում, այդ պատճառով թատրոնի համար շատ կարևոր է նրա աշխատանքներից մեկը ներկայացնելը»,-ասաց Մխիթարյանը։
Ապրիլի 2-ին թատրոնը հանդիսատեսին կներկայացնի «Կապույտ կակաչների փունջը» կատակերգական ներկայացումը, որի մասին տնօրենը չցանկացավ մանրամասն խոսել, բայց խոստացավ, որ բազմաթիվ անակնկալներ կլինեն։
Ապրիլի 21-22-ին կկայանա Ջեյմս Գոլդմանի «Առյուծը ձմռանը» պիեսի բեմադրության պրեմիերան։ Այս բեմադրության վրա աշխատանքը սկսել է Վահե Շահվերդյանը, իսկ ավարտին կհասցնի նրա որդին՝ Սուրեն Շահվերդյանը։
Նա հավելեց, որ մայիսին թատրոնը երկու պրեմիերա կներկայացնի` «Մկների ժողովը»՝ Աթաբեկ Խնկոյանի համանուն առակի հիման վրա (ռեժիսոր՝ Նունե Կիրակոսյան,) և «Զառանցանք երկուսով»՝ Էժեն Իոնեսկոյի պիեսի հիման վրա (ռեժիսոր՝ Ելենա Վարդանյան)։
«Մեր ամբողջ թատերախումբը զբաղված է լինելու, քանի որ ներկայացումներում տարբեր դերասաններ են ներգրավված։ Մենք մտածում ենք մեր հանդիսատեսի մասին, ուստի խաղացանկում ցանկացած ճաշակի ներկայացումներ ենք ներառել՝ դասական, ժամանակակից գործեր, կատակերգություններ, դրամաներ, մանկական ներկայացումներ և այլն»,-ասաց տնօրենը։
Մխիթարյանը նշեց, որ թատրոնը պարբերաբար մրցանակներ են ստանում, արտիստները հյուրախաղերի են մեկնում տարբեր երկրներ, ինչպես նաև փորձում են իրենց դրսևորել նոր դերերում։ Նրա համոզմամբ՝ թատրոնն այժմ վերելք է ապրում, և տեխնիկական հագեցվածության և հետաձգված վերանորոգման խնդիրները չեն խանգարում դրան։
Այս համատեքստում նա պատմեց, որ թատերախումբն արդեն հրավիրված է մի շարք փառատոների և պատրաստվում է այցելել ոչ միայն Սանկտ Պետերբուրգ և Մոսկվա, այլև մի շարք հայկական քաղաքներ՝ մարզերի հանդիսատեսին ուրախացնելու համար: