Ինչպես է ծնվել «Պատիվ ունեմ» երգը

«Կյանքս կտամ հայրենիքիս, հոգիս՝ Աստծուն, պատիվս՝ ինձ»... «Պատիվ ունեմ» ռազմահայրենասիրական երգի այս տողերը շատերին են հայտնի։ Շուրջ 11 տարի է` այս երգն իր ուրույն տեղն ունի հայկական հայրենասիրական երգերի շարքում։ Դժվար է պատկերացնել որևէ զինվորական տոն առանց այս երգի, սակայն քչերին է հայտնի, որ այն գրել է ՀՀ ԶՈւ ԳՇ ռազմանվագախմբային բաժնի նախկին պետ, զինվորական դիրիժոր, պահեստազորի գնդապետ Արմեն Պողոսյանը 2009 թվականին։

Դիրիժորը Sputnik Արմենիայի հետ զրույցում պատմել է, որ ինքը հաճախ էր լսում հայկական բանակի օրհներգ «Երազի իմ երկիր հայրենի»–ն և մտածում էր գրել այդպիսի երգ բոլոր ժամանակների համար։

Այս երգի ստեղծման հետ կապված ուշագրավ պատմություն կա․ խորհրդակցություններից մեկի ժամանակ նախկին նախարար Սեյրան Օհանյանը սպաների համար ծավալուն դասախոսություն է կարդացել զինվորականի պատվի մասին, զինվորականի խոսքի արժեքի մասին։ Պատիվ բառը մեխվել է հեղինակի մտքում, և այդ բառով ոգեշնչված էլ ծնվել է երգը, որտեղ հերոսն ասում է «պատիվ ունեմ» և գնում բարձրունք գրավելու։

Պողոսյանն ընդգծում է, որ այդ երգից հետո «պատիվ ունեմ» բառակապակցությունը նոր իմաստ է ստացել և դարձել զինվորականի ուղեկիցը։

Երգը հնչել է բազմաթիվ երգիչների կատարմամբ, սակայն հեղինակն ինքն այն վստահել է Դավիթ Ամալյանին, քանի որ կարծում է` այդ երգը նրա նման ոչ ոք չի կարող կատարել։ Միևնույն ժամանակ, երբեմն ինքն էլ դիտողություններ էր անում և ուղղորդում երգչին, խնդրում էր հավատարիմ մնալ տեքստի բնօրինակին, քանի որ գրված յուրաքանչյուր տողի մեջ իմաստ կա։

Ի դեպ, Ամալյանի կատարմամբ երգն այնքան հայտնի է դարձել, որ շատերը հենց նրան են համարում դրա հեղինակը։

Ի դեպ, «Պատիվ ունեմ»–ը նաև ՀՀ պաշտպանության նախկին նախարար Սեյրան Օհանյանի սիրելի երգն է, որի դասախոսություններից մեկից ոգեշնչվելով էլ ստեղծվել է երգը։

Երգի ստեղծման հիմքում իր դերի մասին խոսելով` Օհանյանը Sputnik Արմենիայի հետ զրույցում ընդգծեց, որ զինվորականի համար ամենակարևոր հատկանիշը իր պատիվն է, որի հիմքում ընկած է նրա մասնագիտական որակները։ Պատմեց, որ նախարար եղած ժամանակ սպաներին հաճախ է այդ մասին ասել, և նրանց ուղղված իր խոսքը` «Կյանքս հայրենիքին, պատիվս` ոչ ոքի», դարձել է երգի ստեղծման հիմքը։

«Այդ երգն առաջին անգամ լսել ենք մեր բանակի 20–ամյակին, և ոգևորություն եմ ապրել։ Մինչ օրս այդ երգը հնչում է շատ կատարողների կողմից։ Թող բոլոր կատարողներն ինձ ներեն, բայց ոչ ոք Արմեն Պողոսյանի նման չի կատարել այդ երգը։ Ես այդ երգը լսելիս հպարտություն եմ ապրում մեր անցած ճանապարհի, մեր բանակի համար, միևնույն ժամանակ նաև պարտավորվածություն եմ զգում մեր բանակի կողքին կանգնելու»,–ասաց Օհանյանը։

Այդ երգի մեջ Օհանյանի հերոսը հենց շարքային հայ զինվորականն է, որը պատրաստ է կատարել իր առջև դրած խնդիրը և անհրաժեշտության դեպքում իր հրամանատարի կողքին և նրա փոխարեն կանգնել։

Նախկին նախարարը «Պատիվ ունեմ»–ն առանձնացնում է մյուս երգերից, քանի որ շարքում կանգնած զինվորին այն ոգևորում է, ուղղորդում, որ իր պարտականությունները կատարի ավելի ոգևորված, մղում հերոսությունների։

Պահեստազորի գնդապետ Արմեն Պողոսյանը 2009-2022թթ.եղել է ՀՀ ԶՈւ ԳՇ ռազմանվագախմբային գլխավոր դիրիժորն ու բաժնի պետը։ Նա ՀՀ վաստակավոր արտիստ է։ Սովորել է Երևանի Չայկովսկու անվան երաժշտական դպրոցում։ Այնուհետև 1980 - 1984 թվականներին սովորել է Ռոմանոս Մելիքյանի անվան երաժշտական դպրոցում` կոնտրաբասի բաժնում։ Ուսումնառությունից հետո պատրաստվում էր ընդունվել Երևանի Կոմիտասի անվան պետական կոնսերվատորիա, սակայն դրանից 3 ամիս առաջ իմացել է ռազմական դիրիժորի մասնագիտության մասին։ 1985 թվականին ընդունվել էՄոսկվայի կոնսերվատորիայի դիրիժորների ֆակուլտետ, ստացել «զինվորական նվագախմբերի և համույթների կազմակերպում և կառավարում» մասնագիտություն և ռազմական դիրիժորի որակավորում։