ԵՐԵՎԱՆ, 28 հունվարի – Sputnik. Չեխիայի նախագահական ընտրությունների երկրորդ փուլում առաջատարը բանակի պահեստազորային գեներալ Պետր Պավելն է։ Ինչպես հայտնում է ՌԻԱ Նովոստին` հղում անելով Չեխիայի վիճակագրական վարչությանը, 75% ընտրատեղամասերի տվյալների համաձայն` Պետերին կողմ է քվեարկել ընտրողների 56,1%–ը։
Նրա մրցակիցը՝ Չեխիայի նախկին վարչապետ Անդրեյ Բաբիշը, ստացել է քվեների 43,9%-ը և արդեն շնորհավորել Պավելին։
«Շնորհավորում եմ պարոն Պավելին Չեխիայի Հանրապետության ղեկավարի ընտրություններում տարած հաղթանակի կապակցությամբ, ընդունում եմ իմ պարտությունը։ Ցանկանում եմ, որ պարոն Պավելը լինի Չեխիայի Հանրապետության բոլոր քաղաքացիների նախագահը և պայքարի հանուն Չեխիայի շահերի»,- ասել է Բաբիշը։
Նշենք, որ հունվարի 28-ին Չեխիայում անցկացվել է նախագահական ընտրությունների երկրորդ փուլը։
Քվեարկության առաջին փուլում առաջատարը կրկին Պավելն էր եղել, որը մոտ 23 000 քվեով գերազանցել էր Բաբիշին։
Պետր Պավելը կփոխարինի գործող նախագահ Միլոշ Զեմանին, որը նախագահությունը ստանձնել էր 2013 թվականի մարտի 8–ին։
Նոր նախագահի երդմնակալության արարողությունը տեղի կունենա մարտի 8-ին։