ԵՐԵՎԱՆ, 26 հունվարի – Sputnik. Գեղարքունիքի մարզի Սոթք համայնքում սեպտեմբերյան ագրեսիայից հետո վնասված կամ ամբողջությամբ փլուզված տների հիմնական մասն արդեն վերականգնվել և հիմնանորոգվել է։ Կառավարության նիստից հետո լրագրողների հետ զրույցում այս հայտարարությունն արեց Գեղարքունիքի մարզպետ Կարեն Սարգսյանը։
«Ավարտված չեն այն բնակարանների վնասները, որոնց սեփականատերերն այնտեղ չեն ապրում կամ վերցրել են գումարները և չեն ծախսել վնասի վերականգնման վրա։ Ընդհանուր առմամբ այդ ընտանիքները մոտ 14-ն են։ Կա ևս 2 ընտանիք, որոնք ՀՀ–ում չեն գտնվում»,– ասաց Սարգսյանը։
Հիշեցնենք` ՀՀ քննչական կոմիտեն հունվարի 24-ին հայտնել էր, որ 2022 թվականի սեպտեմբերի 13-14-ին Ադրբեջանի կողմից Հայաստանի ինքնիշխան տարածքի նկատմամբ իրականացված ռազմական ագրեսիայի հետևանքով Գեղարքունիքի, Վայոց Ձորի և Սյունիքի մարզերի համայնքներում կատարվել է շուրջ 100 դեպքի վայրի զննություն և պարզել վնասները` ավերված կամ վնասված համայնքապետարանի շենք, հրշեջ փրկարարական ջոկատի շենք, դպրոց, 3 հյուրատուն, հանդիսությունների սրահ, 100-ից ավելի սեփական բնակելի տուն, անասնագոմեր, ջերմոց, մեկ տասնյակի հասնող քաղաքացիական ավտոմեքենաներ, ավտոճանապարհներ, այրված խոտածածկ և անտառածածկ մեծ տարածքներ, պտղատու այգի։
Բացի այդ վնասվել են նշված մարզերում տեղակայված 6 զորամաս, ռազմական օբյեկտներ և տեխնիկա, այդ թվում՝ բուժծառայության 2 մեքենա: