Հայաստանի շախմատի առաջնության չեմպիոնները պարգևատրվեցին

ԵՐԵՎԱՆ, 22 հունվարի – Sputnik. Հայաստանի շախմատի կանանց և տղամարդկանց առաջնությունների չեմպիոններն այսօր պարգևատրվեցին։ Տեղեկությունը հայտնում է ԿԳՄՍ նախարարության մամուլի ծառայությունը։ Պարգևատրման արարողությանը մասնակցել է կրթության, գիտության, մշակույթի և սպորտի փոխնախարար Կարեն Գիլոյանը։

«Շախմատն իսկապես այն քիչ մարզաձևերից է, որտեղ Հայաստանի չեմպիոնի տիտղոսը շատ լուրջ նվաճում է։ Սա մեր ձեռքբերումն է։ Շատ լավ է, որ ունենք այսքան ուժեղ շախմատիստներ և Հայաստանի առաջնությունն անցնում է այսքան լարված պայքարում»,- ասել է Կարեն Գիլոյանը՝ պարգևատրելով կանանց 78-րդ առաջնության հաղթողներին և մրցանակակիրներին։

Կանանց առաջնությունում գրոսմայստեր Մարիա Գևորգյանը չեմպիոնի կոչումը նվաճել է կարիերայում 5-րդ անգամ՝ 9 հնարավորից վաստակելով 7 միավոր։ Երկրորդ տեղում միջազգային վարպետ Սուսաննա Գաբոյանն է՝ 6.5 միավորով, իսկ լավագույն եռյակը եզրափակել է ՖԻԴԵ-ի վարպետ Արփինե Գրիգորյանը` 5,5 միավորով:

Տղամարդկանց 83-րդ առաջնության չեմպիոնին և մրցանակակիրներին պարգևատրել է Հայաստանի շախմատի ֆեդերացիայի նախագահի առաջին տեղակալ Սմբատ Լպուտյանը։

«Առաջնությունը շատ հետաքրքիր ու լարված ընթացք ունեցավ․ մինչև վերջին րոպեն պարզ չէր, թե ով է հաղթելու»,- նշել է Սմբատ Լպուտյանը։

Տղամարդկանց առաջնության վերջին՝ 9-րդ տուրում, Սամվել Տեր-Սահակյանը հաղթել է Ռոբերտ Հովհաննիսյանին և նվաճել Հայաստանի չեմպիոնի կոչումը՝ վաստակելով 6.5 միավոր: Երկրորդ տեղում գրոսմայստեր Մանուել Պետրոսյանն է՝ 6 միավորով: Գրոսմայստերներ Ռոբերտ Հովհաննիսյանը և Տիգրան Հարությունյանը վաստակել են 5.5–ական միավոր, սակայն լրացուցիչ ցուցանիշներով երրորդ տեղը զբաղեցրել է Ռոբերտ Հովհաննիսյանը: