ԵՐԵՎԱՆ, 20 հունվարի – Sputnik. ABC7 հեռուստաալիքը փոքրիկ սյուժե է ներկայացրել Լոս Անջելեսի հայկական Sassoun Bakery հացաբուլկեղենի փռի մասին, որն օրերս նշել է իր 50-ամյակը:
Փռի տերը՝ 76-ամյա Դավիթ Երեցյանը, ծագումով Սասունից է․ ծնվել է այնտեղ, բայց ավելի ուշ ընտանիքը տեղափոխվել է Սիրիա, իսկ այնտեղից՝ ԱՄՆ։
Իր փոքրիկ, բայց խիստ հաջողակ բիզնեսը նա բացել է 1985 թվականին Արևելյան Հոլիվուդում՝ «Փոքրիկ Հայաստան» անունով հայտնի թաղամասում։
«Մենք հայտնի ենք մեր լահմաջոյով, դա աղացած մսով և բանջարեղենով լոշիկ է, որը նաև «հայկական պիցցա» են անվանում։ Ներկայումս փուռը 5 խանութ ունի ամբողջ Լոս Անջելեսում, բայց ամեն ինչ սկսվել է Սանտա-Մոնիկա բուլվարում, 35 տարի առաջ»,-պատմում է փռի սեփականատիրոջ դուստրը՝ Լարա Երեցյանը։
Նրա խոսքով՝ համավարակը լուրջ հարված էր բիզնեսի համար, բայց ընտանիքը թևաթափ չի եղել, քանի որ իր գործն իսկապես կարևոր է համարում։
«Ժամանակի ընթացքում մենք սովորեցինք։ Բոլորը ստիպված էին հարմարվել։ Սա կարևոր բիզնես է, ուստի այն պետք է շարունակվեր»,-ասում է Լարան։
Բայց հիմա ընտանիքը պայքարում է հանուն այն բանի, ինչը, ըստ նրանց, ավելի կարևոր է, քան իրենց տեղական համայնքը՝ հանուն Հայաստանում խաղաղության։ Երիցյանները մասնակցել են Հայաստանի զինվորների և ժողովրդի հետ համերաշխության վերջին հանրահավաքին, որը կազմակերպել էր Ամերիկայի Հայ դատի հանձնախմբի հոլիվուդյան բաժանմունքը։
«Եկել է ժամանակը, որ աշխարհը միավորվի և միջազգային հանրությանն ասի՝ բավական է»։
Լարան նշել է, որ հացաբուլկեղենի փուռը մի քանի այլ ձեռնարկությունների հետ միասին հասույթի մի մասը նվիրաբերում է Հայաստանի բնակիչների համար դեղորայքի, սննդի և առաջին անհրաժեշտության պարագաների գնմանը: