ԵՐԵՎԱՆ, 18 հունվարի – Sputnik. ՀՀ–ում Ռուսաստանի, Մեծ Բրիտանիայի, Իրանի և ԱՄՆ–ի դեսպանատները ցավակցություններ են հայտնել Գեղարքունիքի մարզի զորամասերից մեկում բռնկված հրդեհի հետևանքով զոհված զինծառայողների ընտանիքներին։ Այս մասին դիվանագիտական կառույցները հայտնել են Twitter-ի իրենց էջերում։
«Շատ տխուր լուր է Գեղարքունիքի մարզի Ազատ գյուղում տեղի ունեցածը։ Բռնկված հրդեհը 15 զինծառայողի կյանք է խլել։ Իմ խորին ցավակցությունն եմ հայտնում նրանց սիրելինեերին և հարազատներին»,– գրել է ՄԹ դեսպան Գալագերը։
ՀՀ-ում ՌԴ դեսպանատունն էլ նշել է, որ անկեղծ ցավակցություն է հայտնում Գեղարքունիքի մարզի զորամասերից մեկի տարածքում բռնկված հրդեհի հետևանքով զոհված զինծառայողների ընտանիքներին, ընկերներին և ծառայակիցներին։ Վիրավորներին էլ մաղթել են շուտափույթ ապաքինում։
Իրանի դեսպանությունից հայտնել են, որ շուտափույթ ապաքինում են մաղթում վիրավորներին, իսկ իրենց մտքերն ու կարեկցանքները զոհերի և նրանց ընտանիքների հետ են։
ԱՄՆ դեսպանատան գործերի ժամանակավոր հավատարմատար Չիփ Լայթինեն էլ Twitter-ում գրել է, որ Հայաստանում ԱՄՆ դեսպանության անունից խորին ցավակցությունն են հայտնում այսօր հայկական զորամասերից մեկում բռնկված հրդեհի հետևանքով հայ զինծառայողների ողբերգական մահվան առիթով։
«Այս պահին մենք մեր զորակցությունն ենք հայտնում իրենց կորուստը սգացողներին»,– գրել է Լայթինեն։
Նրանք նույնպես շուտափույթ ապաքինում են մաղթել տուժածներին։
Հիշեցնենք, որ հունվարի 19-ին՝ ժամը 01:30-ի սահմաններում, դեռևս չպարզված հանգամանքներում հրդեհ է բռնկվել Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում։
Հաղորդվել էր, որ չնայած դեպքի վայրում ծավալվել են հրդեհաշիջման աշխատանքներ, հրդեհի հետևանքով կա 15 զոհ և 3 վիրավոր։ Մահացածները ժամկետային զինծառայողներ են։
Դեպքի առնչությամբ արդեն պաշտոնանկություններ են եղել։