ԵՐԵՎԱՆ, 13 հունվարի, Sputnik - Արմենուհի Մխոյան. ՀՀ բոլոր մարզպետարաններում իրականցվելու են կառուցվածքային փոփոխություններ՝ համաձայն ՀՀ վարչապետի 2022 թվականի թիվ 15/50 որոշման: Ըստ կառուցվածքային փոփոխությունների՝ մարզպետարանի 14 ստորաբաժանումների փոխարեն կգործի 10-ը, Sputnik Արմենիային տեղեկացրեց Շիրակի մարզպետարանի գլխավոր քարտուղար Արսեն Աբրահամյանը նշելով, որ որոշումն ուժի մեջ է մտնելու 2023 թվականի մարտի 1-ից: «Սա նշանակում է, որ բոլոր մարզպետարանները 2023 թվականի մարտի 1-ից ունենալու են նոր կառուցվածք: Խոսքը վերաբերում է միայն կառուցվածքային փոփոխություններին. որոշ կառուցվածքային ստորաբաժանումներ միաձուլվում են»,-նշեց պատասխանատուն:
Արսեն Աբրահամյան
© Sputnik / Armenuhi Mkhoyan
Մարզպետարանների վերակազմավորումը չի ենթադրում գործառույթների պակասեցում և, ինչն ամենակարևորն է, աշխատատեղերի կամ աշխատավարձի կրճատումներ, բայց հնարավոր է պաշտոնների փոփոխություն:
«Ինչ վերաբերում է կրճատումներին, ապա սահմանված է, որ Շիրակի մարզպետարանում աշխատակիցների առավելագուն թիվը 132 է՝ այդ որոշումը չի փոխվել՝ այսինքն տվյալ կառուցվածքային փոփոխությունն աշխատողների կրճատմամբ չի ուղեկցվելու, բայց շատ հնարավոր է վարչության կամ բաժինների պետերի հաստիքների փոփոխություն՝ նրանց կառաջարկվեն այլ պաշտոններ»:
Մարզպետարանների ստորաբաժանումների արդյունքում իրենց պաշտոնից կամ աշխատանքից «զրկվող» աշխատակիցներին կառաջարկվի նոր աշխատանք նույն մարզպետարանում:
«7 ստորաբաժանումների միաձուլման արդյունքում ստեղծվում են նոր 3 ստորաբաժանումներ, իսկ մյուս վարչություններն ու բաժիններում հնարավոր են միայն անվանական փոփոխություններ, բայց էլի աշխատակիցների կրճատում չի լինի»,-նշեց մեր զրուցակիցը։
Հավելենք, որ ՀՀ կառավարության որոշման համաձայն միավորվում են մարզպետարանի քաղաքաշինության վարչությունն ու հողօգտագործման բաժինը, առողջապահության և սոցիալական ապահովության վարչությունը և ընտանիքի, երեխաների և կանանց իրավունքների պաշտպանության բաժինը, ինչպես նաև միավորվում են քարտուղարությունը, տեղեկատվության ու հասարակայնության հետ կապերի և անձնակազմի կառավարման բաժինները: