ԵՐԵՎԱՆ, 13 հունվարի - Sputnik. Մինսկի խումբը գոյություն ունեցող երկխոսությունների հարթակներից մեկն է, բայց միակը չէ։ Այսօր ՀՀ Ազգային ժողովում լրագրողների հետ ճեպազրույցի ժամանակ հայտարարեց Ֆրանսիայի ԱԺ նախագահ Յաել Բրաուն-Պիվենը։
Նա հավելեց, որ շատ կարևոր է, որ կողմերի միջև երկխոսությունը վերականգնվի և դա պետք է ընդունեն մասնակից բոլոր կողմերը։
«Մենք` խորհրդարանականներս, կոչ ենք անում վերադառնալ Մինսկի խմբի երկխոսությանը, բայց նշեմ, որ սա միակ ձևը չէ, բոլոր ձևերը պետք է կիրառել կողմերին երկխոսության վերադարձնելու համար»,–ասաց նա։
Մինսկի խմբի համանախագահության մասին խոսեց նաև ՀՀ ԱԺ նախագահ Ալեն Սիմոնյանը։
«ԵԱՀԿ Մինսկի խմբի հարցը մշտապես պահելով օրակարգում՝ մենք չպետք է նվազեցնենք մյուս հարթակների դերը»,–նշեց Սիմոնյանը։
Նա հիշեցրեց, որ այս պահին գոյություն ունեն հենց Ֆրանսիայի առաջարկով ստեղծված 1-2 այլ հարթակներ, որոնք պակաս կարևոր չեն։
Նշենք, որ Մինսկի խմբի ամերիկացի համանախագահ, Կովկասի բանակցությունների հարցերով ԱՄՆ պետքարտուղարի ավագ խորհրդական Ֆիլիպ Ռիքերն ավելի վաղ ասել էր, որ ԵԱՀԿ Մինսկի խմբի մեխանիզմն այլևս չի գործում, և Վաշինգտոնը զբաղված է Ադրբեջանի ու Հայաստանի միջև խաղաղ կարգավորմամբ միայն Բաքվի և Երևանի հետ անմիջական փոխգործակցության միջոցով։ Ըստ նրա` ստեղծվել է մի իրավիճակ, երբ կողմերը կարող են կոնսենսուսի միջոցով վերջ տալ այդ մանդատին։