ԵՐԵՎԱՆ, 12 հունվարի – Sputnik. Հայաստանում 2023 թվականին կանխատեսվում է զբոսաշրջիկների մեծ հոսք, որոնց թիվը եթե չգերազանցի, ապա գոնե հավասար կլինի 2019 թվականի ցուցանիշին (1,9 մլն)։ Այս մասին Sputnik Արմենիային ասաց Զբոսաշրջության կոմիտեի նախագահ Սիսիան Պօղոսեանը`պարզաբանելով, որ կառույցը դրա համար մի շարք քայլեր է ձեռնարկում, որոնց մեջ առանձնահատուկ տեղ է գրավում մարքեթինգային քաղաքականությունը։
Սիսիան Պօղոսեան
© Sputnik / Andranik Ghazaryan
Ավելի վաղ հայտնի էր դարձել, որ Հայաստանն ընդգրկվել է Forbes-ի վարկանիշային ցանկում` որպես 2023 թվականի լավագույն ճանապարհորդական ուղղություններից մեկը, իսկ Երևանը ճանաչվել է աշխարհի ամենաանվտանգ մայրաքաղաքներից մեկը։
«Այս տարի առաջին անգամ Զբոսաշրջության կոմիտեն համագործակցություն է հաստատել չորս խոշոր ավիաընկերությունների հետ, այդ թվում են WizzAir-ը, Lufthansa-ն, Air France-ը։ Մարտին մենք կմեկնենք Գերմանիա և կմասնակցենք աշխարհի խոշորագույն զբոսաշրջային «ITB Berlin» ցուցահանդեսին, ինչպես նաև պատրաստվում ենք ATM Dubai 2023 միջազգային ցուցահանդեսում Հայաստանը ներկայացնելուն »,- ասաց Պօղոսեանը։
Նրա խոսքով`նախատեսվում է Հայաստանը ներկայացնել որպես զբոսաշրջային ուղղություն Գերմանիայի և Ֆրանսիայի տուրօպերատորներին: Միևնույն ժամանակ մայիսին, երկար ընդմիջումից հետո (COVID-ի և պատերազմի պատճառով), Երևանում կկայանա խոշոր ցուցահանդես, որտեղ կներկայանան Հայաստանի բոլոր մարզերը։ Դա կօգնի նորովի բացել հանրապետությունը ոչ միայն օտարերկրյա զբոսաշրջիկների, այլև հենց Հայաստանում ապրող հայերի համար։
Զբոսաշրջության կոմիտեի ղեկավարը հիշեցրեց, որ 2019 թվականին Հայաստան է այցելել 1 մլն 900 հազար զբոսաշրջիկ, իսկ 2022 թվականին, նախնական տվյալներով` 1 մլն 670 հազար զբոսաշրջիկ, որոնցից ամենաշատ հոսքը եղել է ՌԴ–ից (46 տոկոս), Վրաստանից, Իրանից , ԱՄՆ–ից և Գերմանիայից:
Միևնույն ժամանակ, 2022 թվականի նոյեմբեր–դեկտեմբերի ցուցանիշները 2019 թվականի նոյեմբեր–դեկտեմբեր ցուցանիշների (110 685) հետ համեմատած ավելի բարձր են եղել։ Միայն դեկտեմբերին Հայաստան է ժամանել 130. 429 զբոսաշրջիկ, որը վերջին 5 տարվա ընթացքում ամենաբարձր ցուցանիշն է դեկտեմբերի համար։
Պօղոսեանի խոսքով` 2022 թվականին զբոսաշրջիկների հոսքն ավելի շատ կլիներ, եթե չլիներ Ադրբեջանիսեպտեմբերյան ագրեսիան, որը միանշանակ բացասական ազդեցություն է ունեցել տուրիզմի զարգացման վրա։
Զբոսաշրջության կոմիտեի նախագահն ընդգծեց, որ չնայած դրան` բոլոր ուղղություններով աշխատանք է տարվել ոչ միայն կոմիտեի, այլև մասնավոր հատվածի կողմից։ Հայաստանը ներկայացվել է աշխարհին որպես անվտանգ և խաղաղ երկիր։