ԵՐԵՎԱՆ, 12 հունվարի - Sputnik. Հայ-ադրբեջանական հարաբերությունների մասին հաշվետվությունը կներկայացվի ԵԽԽՎ-ի՝ 2023 թվականի ձմեռային լիագումար նստաշրջանում։ Տեղեկությունը հրապարակվել է Եվրոպայի Խորհրդի Խորհրդարանական վեհաժողովի պաշտոնական կայքում։
Զեկույցը կներկայացվի Եվրոպայի Խորհրդի տարածքում կոնֆլիկտային տարածաշրջաններում ԵԽԽՎ մոնիտորինգի մասին ամփոփ զեկույցի շրջանակում: Զեկույցի ամփոփագրում նշվում է, որ Հայաստանի հարցով զեկուցողներ Կիմմո Կիլյունենը (Ֆինլանդիա) և Բորյանա Օբերգը (Շվեդիա), ինչպես նաև Ադրբեջանի հարցով զեկուցողներ Յեն Լիդել-Գրեյնջերը (Մեծ Բրիտանիա) և Լիզա Քրիստոֆերսենը (Նորվեգիա) շարունակել են հետևել իրադարձությունների զարգացմանը, այդ թվում` Լեռնային Ղարաբաղի շուրջ:
Զեկույցում նշվում է, որ 2022 թվականի հունվարի 11-ին հայ-ադրբեջանական սահմանին նոր բախումներ են գրանցվել։ Մարտի 8-ին Հայաստանի Հանրապետությունից Լեռնային Ղարաբաղ տանող գազատարը վնասվել է Ադրբեջանի վերահսկողության տակ գտնվող հատվածում։ Ադրբեջանը հրաժարվել է վնասված հատվածի հասանելիություն տալ Հայաստանին։ 10 օր անց գազամատակարարումը վերականգնվել է։
Մեկ շաբաթ անց՝ մարտի 24-ին, հրադադարի մասին համաձայնագիրը խախտվել է, իսկ ադրբեջանական զորքերը շարժվել են դեպի ՌԴ խաղաղապահների պատասխանատվության գոտի։ Օգոստոսի 2-ին ռուսական խաղաղապահ առաքելությունը հաստատել է, որ Ադրբեջանը մի քանի անգամ խախտել է հրադադարը։
Սեպտեմբերի 12-14-ը ադրբեջանական զինված ուժերը հարձակում են ձեռնարկել սահմանի երկայնքով և առաջ շարժվել դեպի Հայաստանի միջազգայնորեն ճանաչված տարածք՝ օգտագործելով հրետանի և անօդաչու սարքեր՝ հայտարարելով, որ հարվածները հասցվել են հայկական կողմի «լայնածավալ սադրանքներից» հետո (չակերտները բնօրինակում են․ խմբ.):
Հոկտեմբերի 10-ին մոնիտորինգային կոմիտեի նախաձեռնությամբ ԵԽԽՎ-ն քննարկումներ է անցկացրել սեպտեմբերյան բախումների և քաղաքացիական բնակավայրերի ու ենթակառուցվածքների վրա հարվածների հարցերի շուրջ:
Հոկտեմբերի 13-ին Հայաստանի հարցով համազեկուցողները հանդես են եկել հայտարարությամբ՝ կոչ անելով Ադրբեջանի իշխանություններին անհապաղ լքել Հայաստանի Հանրապետության տարածքը և ազատ արձակել պահվող ռազմագերիներին: