ԵՐԵՎԱՆ, 11 հունվարի – Sputnik. ՀԱՊԿ–ի զորավարժությունների այլընտրանք այսօր գոյություն չունի։ Ազգային ժողովում լրագրողների հետ ճեպազրույցում ասաց ՀՀ պաշտպանության նախկին նախարար, «Հայաստան» խմբակցության ղեկավար Սեյրան Օհանյանը ` մեկնաբանելով ՀՀ–ում ՀԱՊԿ զորավարժությունները չանցկացնելու որոշումը։
Երեկ ՀՀ վարչապետ Նիկոլ Փաշինյանն իր ասուլիսում հայտարարեց, որ ՀԱՊԿ զորավարժություններն այս տարի Հայաստանում չեն կայանա, քանի որ այս իրավիճակում Հայաստանը նպատակահարմար չի համարում։
«Մենք ՀԱՊԿ–ից դո՞ւրս ենք եկել, իհարկե` ոչ։ Այդպիսի բոլոր միջոցառումներն ընդհանրապես այս վիճակում պետք է օգտագործվեն մեր զինված ուժերի պատրաստականության, նրանց ունակությունների բարձրացման համար»,–ասաց Օհանյանը։
Ըստ նրա՝ այս որոշումից ենթադրվում է, որ իշխանությունները հակառակորդի հետ պայմանավորվածություն ունեն բանակը չհզորացնելու, չվերականգնելու վերաբերյալ, իսկ այդ զորավարժությունները միայն օգուտ կտային հայոց բանակին։
«Եթե Հայաստանը հրաժարվում է ՀԱՊԿ զորավարժություններից, դա հավասարազոր է, որ մեր զինված ուժերը հրաժարվում են ամենաբարձր ուսուցման ձևից, որտեղ կատարելագործվում է դաշտային վարժվածությունը, պատրաստությունը պատերազմ մղելու, պաշտպանելու համար»,- նշեց Օհանյանը։
Նախկին նախարարի խոսքով` զորավարժությունների անցկացման նպատակը զորքերի պատրաստության կատարելագործումն է, իսկ ՀԱՊԿ–ի շրջանակում՝ նաև միջազգային փորձի փոխանակումը, հրամանատարների շտաբների զորքերի պատրաստության աստիճանի բարձրացումը։
Նա հիշեցրեց, որ տարիներ առաջ ՀԱՊԿ զորավարժություններ անցկացվել են և՛ Հայաստանում, և՛ տարբեր երկրներում, և ՀՀ ԶՈՒ–ն առաջատարներից մեկն է եղել տարածաշրջանում։