ԵՐԵՎԱՆ, 10 հունվարի – Sputnik. Հայաստանը որևէ պաշտոնական առաջարկ չի ստացել Ռուսաստանի կողմից միութենական պետության կազմ մտնելու։ Այսօր հրավիրված ասուլիսի ժամանակ այս մասին հայտարարեց ՀՀ վարչապետ Նիկոլ Փաշինյանը։
«Նման առաջարկ պաշտոնական ձևով չի եղել և չէր էլ կարող լինել։ Բայց իրականությունը, ցավոք, այդքան պարզ չէ, որքան թվում է: Երբեմն պետք է ավելի խորը դիտարկենք հարցերի ոչ միայն տեքստը, այլ ենթատեքստը: Մեզ համար ՀՀ ինքիշխանությունը, պետականությունն ու անկախությունը բացարձակ արժեքներ են»,–ասաց նա։
Լրագրողի նկատառմանը, թե ոչ պաշտոնական խողովակներով նման ճնշումներ եղե՞լ են` Փաշինյանն արձագանքեց` նայած, թե ինչ նկատի ունեն,. օրինակ` փորձագետների կողմից շարունակաբար զարգացվող խոսույթներն էլ, ոչ պաշտոնական շփումներն էլ կարող են ոչ պաշտոնական խողովակներով այդ հարցը բարձրացնել համարվել։
Ճշտող հարցին, թե ՀՀ ԱԽ քարտուղար Արմեն Գրիգորյանը դրա՞նք է նկատի ունեցել, երբ ասել է, որ Հայաստանի վրա ճնշումներ կան՝ միանալու Միութենական պետությանը, Փաշինյանն ասաց․ «Ենթադրում եմ՝ այդ թվում դրանք է նկատի ունեցել»։
Նշենք, որ Միութենական պետության կազմի մեջ են մտնում Ռուսաստանն ու Բելառուսը։