ԵՐԵՎԱՆ, 6 հունվարի - Sputnik. Առաջիկայում հնարավոր է` իր պաշտոնին հրաժեշտ տա ՀՀ էկոնոմիկայի նախարար Վահան Քերոբյանը։ Այս մասին գրում է «Ժողովուրդ» օրաթերթը։
«Կառավարության ղեկավարը դժգոհ է ՀՀ էկոնոմիկայի նախարար Վահան Քերոբյանի աշխատանքից, որը նաև իր հայտարարությունների պատճառով հաճախ է զավեշտալի իրավիճակում հայտնվում»,-նշում է լրատվամիջոցը:
Ինքը՝ Վահան Քերոբյանը լրատվականի հարցին՝ արդյոք իր աշխատանքից դժգոհություն ստացել է, թե ոչ, հստակ պատասխան չի տվել։
«Նախարարը սկզբում հետաքրքրվեց` կատակում ենք, թե ոչ, ապա, երբ կրկնեցինք հարցը, նա այդպես էլ որևէ պատասխան չտվեց՝ հորդորելով դիմել նախարարության լրատվական բաժին»,-գրում է թերթը:
«Ժողովուրդ»–ի տեղեկություններով` թիրախում նաև ՀՀ առողջապահության նախարար Անահիտ Ավանեսյանն է։
Նշենք, որ 2022 թվականի վերջին իրենց պաշտոններին հրաժեշտ տվեցին ՀՀ փոխվարչապետ Համբարձում Մաթևոսյանն ու ՀՀ կրթության, գիտության, մշակույթի և սպորտի նախարար Վահրամ Դումանյանը: