ԵՐԵՎԱՆ, 5 հունվարի – Sputnik. Իրանի հյուսիսում գտնվող Մազենդերան նահանգի դատարանը մահապատժի է դատապարտել երկրում վերջին անկարգությունների առաջնորդներից մեկին` Արշիա Թաքդաստանին։ Տեղեկությունը հայտնում է ISNA գործակալությունը` հղում անելով նահանգի արդարադատության նախարարության գլխավոր վարչությանը:
Ավելի վաղ իրանական դատարանները երկրի տարբեր կենտրոններում մահապատժի էին դատապարտել առնվազն 6 մարդու։
«Նոուշեհրի շրջանում վերջերս տեղի ունեցած անկարգությունների կազմակերպման մեջ մեղադրվող Թաքդաստանի գործով հնչեցված հայտարարությունների առնչությամբ հայտնում ենք, որ տվյալ անձը ստանձնել է քաղաքի գլխավոր հրապարակում ամբոխը ղեկավարելու և անկարգությունների ընթացքում հանցավոր գործողություններ կատարելու պատասխանատվությունը։ Դատարանի նիստերից և ամբաստանյալի և նրա փաստաբանի պաշտպանության մասին հայտարարությունները լսելուց հետո դատարանը Արշիա Թաքդաստանին դատապարտել է... մահապատժի»,– գործակալությանը հայտնել է արդարադատության նախարարության վարչությունը։
Հիշեցնենք` Իրանում սեպտեմբերի կեսերից զանգվածային անկարգություններ և բողոքի ցույցեր են տեղի ունենում 22-ամյա Մահսա Ամինիի մահվան կապակցությամբ: Երկրի բնակիչները իշխանություններին են մեղադրում Մահսայի մահվան մեջ։
Բողոքի ցույցերը արմատական-ծայրահեղական բնույթ են ստացել։ Անկարգությունների մասնակիցները հարձակումներ են գործել հոգևորականների, իրանական մզկիթների վանահայրերի, անվտանգության ուժերի՝ ոստիկանության, ԻՀՊԿ–ի (Իսլամական հեղափոխության պահապանների կորպուս), ինչպես նաև ռազմական խոշոր կառույցներից մեկի՝ Բասիջի անդամների վրա։ Հոկտեմբերի վերջին և նոյեմբերի սկզբին Իրանում ևս երկու ահաբեկչություն է տեղի ունեցել՝ առաջինը` Շիրազ քաղաքում, երկրորդը ՝ Խուզեստան նահանգի փոքրիկ քաղաքում, որը գտնվում է երկրի հարավում: Ահաբեկիչները կրակ են բացել մի խումբ քաղաքացիական անձանց և ոստիկանության աշխատակիցների ուղղությամբ։
Իրանի իշխանությունները ցուցարարներին աջակցելու համար մեղադրում են Արևմուտքի երկրներին, որոնք իրենց ԶԼՄ-ներում տարածում են հակաիրանական բնույթի հաղորդագրություններ, ինչպես նաև կոչ են անում երկրի բնակչությանը տապալել իշխանությունը: