ԵՐԵՎԱՆ, 4 հունվարի – Sputnik. Գեղարքունիքի մարզում 3 անձի կողմից անչափահաս աղջկան տանից առևանգելու վերաբերյալ վարույթի նյութերն ուղարկվել են դատարան։ Տեղեկությունը հայտնում է ՀՀ քննչական կոմիտեի մամուլի ծառայությունը։
Ըստ հաղորդագրության` 2022 թվականի հուլիսի 31-ին՝ ժամը 22:00-ի սահմաններում, Գեղարքունիքի մարզի Վարդենիս համայնքի Փոքր Մասրիկ բնակավայրի 19, 21 և 34–ամյա բնակիչները գնացել են նույն համայնքում գտնվող տներից մեկը:
Նշվում է, որ ընտանիքի մայրն այդ պահին տանը չի եղել։ Երիտասարդները 14-ամյա աղջկան դուրս են հանել բնակարանից նրա կամքին հակառակ և նստեցրել «Օպել» մանկիշի ավտոմեքենա, որը վարել է 34-ամյա տղամարդը։ Տղամարդիկ ասել են, որ աղջկան բաց կթողնեն միայն մորը տեսնելու դեպքում։ Նրանք աղջկան տարել են Գեղարքունիքի մարզի Փոքր Մասրիկ գյուղում գտնվող հանդիսությունների սրահի մոտ։
Այստեղ 2 երիտասարդն իջել են մեքենայից, իսկ 34-ամյա տղամարդը, նկատելով անչափահաս աղջկա հուզված վիճակը, նրան հետ է տարել տուն:
19 և 21-ամյա երիտասարդներին մեղադրանք է ներկայացվել ՀՀ քրեական օրենսգրքի 191-րդ հոդվածի (մարդուն առևանգելը) 2-րդ մասի 3-րդ, 5-րդ, 8-րդ կետերով և 207-րդ հոդվածի (բնակարանի անձեռնմխելիությունը խախտելը) 1-ին մասով։ 34-ամյա տղամարդուն մեղադրանք է առաջադրվել ՀՀ քրեական օրենսգրքի 191-րդ հոդվածի (մարդուն առևանգելը) 2-րդ մասի 3-րդ, 5-րդ, 8-րդ կետերով:
19-ամյա երիտասարդի նկատմամբ որպես խափանման միջոց է կիրառվել կալանքը, իսկ մյուս երկու մեղադրյալների նկատմամբ՝ բացակայելու արգելքը:
Նախաքննությունն ավարտվել է։ Հսկող դատախազը հաստատել է մեղադրական եզրակացությունը։ Քրեական վարույթի նյութերն ուղարկվել են դատարան։