ԵՐԵՎԱՆ, 4 հունվարի – Sputnik. ՀՀ քննչական կոմիտեի նախագահ Արգիշտի Քյարամյանը համաձայն չէ, թե 44-օրյա պատերազմի վերաբերյալ հարուցված քրեական վարույթները ձգձգվում են։ Հայաստանի հանրային հեռուստաընկերության եթերում նա նշեց, որ ձգձգման մասին խոսելիս պետք է անդրադառնալ վարույթների ծավալին և քննության որակին։
Արցախյան 44-օրյա պատերազմի վերաբերյալ նախաձեռնվել են 1600 վարույթներ, որոնցից 160-ի ընթացքը լուծվել է։
ՔԿ նախագահն ընդգծեց, որ շատ դետալային քննություն է իրականացվում, քննության լայն շրջանակ է վերցվել, որպեսզի հնարավոր լինի բացահայտել բոլոր հարցերը` իրենց մանրամասնություններով։
«Մենք ընդհուպ դիվիզիայից մինչև վաշտի մակարդակ, կորպուսից երբեմն դասակի մակարդակի քննություն ենք իրականացնում, և քննության այս աստիճանի բազմաշերտությունը պայմանավորված է նրանով, որ մեր հիմնական նպատակն ամբողջությամբ պարզաբանելն ու բացահայտելն է պատերազմում մեր պարտության պատճառներն ու պայմանները և այն անձանց, որոնք նպաստել են այդ պարտությանը»,– նշեց Քյարամյանը։
Նրա խոսքով` առնվազն 17.000 մարդ է հարցաքննվել, ինչն արդեն վկայում է քննության ծավալների մասին։ ՔԿ նախագահը հայտնեց, որ քրեական գործերը պայմանականորեն բաժանվել են 2 մասի` սպաների և շարքային անձնակազմի վերաբերյալ քննվող քրեական գործեր։
Սպաների վերաբերյալ քննվող քրգործերը կենտրոնացվել են զինվորական քննչական գլխավոր վարչության հատկապես կարևոր գործերի վարչությունում, գործերը միացվել են ըստ ուղղությունների։ Օրինակ` 10-րդ դիվիզիայի վերաբերյալ քննվող քրեական գործ, 18-րդ դիվիզիայի, առաջին բանակային կորպուսի վերաբերյալ, Շուշիի անկման դրվագն առանձին քրգործով է քննվում, հոկտեմբերի 7-8-ի վերաբերյալ օպերացիան և այլն։ Նա ընդգծեց, որ շատ կարևոր քրեական գործ ունեն, որը վերաբերում է նախապատերազմական իրադրությանը։
Առանձնացված քրգործ կա նաև, որը վերաբերում է պատերազմի ընթացքում և պատերազմից առաջ զորահավաքի կազմակերպմանը։ Քյարամյանի խոսքով` յուրաքանչյուր դրվագով մանրամասն քննություն է իրականացվում, և քննչական մեծ խմբեր են աշխատում։
«Ցանկացած փաստարկ, որը քննությամբ ի հայտ է գալիս, անպայման մի քանի անգամ տարբեր ձևերով ստուգվում և վերստուգվում է։ Սա պայմանավորված է նրանով, որ մենք շատ լավ գիտակցում ենք, որ նրանք, ովքեր այս գործերով ենթադրյալ հանցանք կատարած անձինք են համարվում, որպես կանոն վաստակ ունեցող զինվորականներ են, և մեզ համար շատ բարդ է որոշումներ կայացնել այդպիսի անձանց վերաբերյալ։ Մենք հստակ խնդիր ենք դրել մեր առջև, որ այս գործերով պետք է հարյուրտոկոսանոց հիմնավորվածություն և ներքին համոզմունք ունենանք, որ կարողանանք գործերի ընթացքները լուծել»,– շեշտեց ՔԿ նախագահը։
Նա հայտնեց, որ 70-ից ավելի սպաներ մեղադրյալ են։
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորակազմը՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին: